विराटनगर । मोरङ प्रहरीले सीमावर्ती भारतीय बजार जोगबनीका २६ वर्षीय रवि कुमारलाई पक्राउ गरेको छ ।
नेपाली युवतीहरूलाई ‘ट्र्याप’ मा पारेर यौन शोषण गरेको आरोपमा उनलाई प्रहरीले शुक्रबार पक्राउ गरेको हो ।
सामाजिक सञ्जालमार्फत् नजिक भएर ‘ब्ल्याकमेल’ गर्दै नेपाली युवतीहरूमाथि पटक-पटक यौन शोषण गरेको आरोपमा उनलाई पक्राउ गरिएको मोरङ प्रहरी प्रवक्ता प्रहरी नायब उपरीक्षक रन्जनकुमार दाहालले जानकारी दिए ।
डिएसपी दाहालका अनुसार विराटनगरको महेन्द्र चोकबाट पक्राउ परेका रवि कुमारलाई आवश्यक अनुसन्धान एवम् कारबाहीका लागि काठमाडौं पठाइएको छ ।
पीडित युवतीबाट उनीविरुद्ध जिल्ला प्रहरी परिसर काठमाडौंमा जरबजस्ती करणीको जाहेरी परेका कारण काठमाडौं प्रहरीले मोरङ प्रहरीसँगको समन्वयमा रवि कुमारलाई पक्राउ गरेको हो ।
जोगबनीमा बसेर सामाजिक सञ्जालमार्फत् नेपाली किशोरीसँग अनलाइन सम्पर्क गर्दै अनेक लोभ देखाएर यौन शोषण गर्ने गरेको पाइएको प्रहरीले जनाएको छ ।
उनीमाथि अनलाइनमा सम्पर्क बढाएर नेपाली युवतीलाई ट्र्यापमा पार्दै होटलमा बोलाएर बारम्बार यौन शोषण गरेको आरोप छ ।
रवि कुमारले यौन सम्बन्ध बनाएको भिडियोसमेत खिचेर युवतीलाई ट्रयापमा पार्दै ‘ब्ल्याकमेल’ गर्ने गरेको प्रहरीको भनाइ छ ।
प्रहरीका अनुसार अनलाइनमार्फत नजिक भएर साथी बनाएपछि यौन सम्बन्ध राखेर अश्लिल भिडियो बनाउने र युवतीलाई ट्रयापमा पार्दै ‘ब्ल्याकमेल’ गर्ने गरेको पाइएको हो ।
प्रहरीको प्रारम्भिक अनुसन्धानबाट अहिलेसम्म उनले १५ जनाभन्दा बढी नेपाली युवतीलाई ट्रयापमा परिसकेको खुलेको छ ।
उनीबाट पीडित हुने नेपाली युवतीको संख्या बढ्दै गएको प्रहरीले जनाएको छ ।
प्रहरीका अनुसार उनले त्यसरी नै ‘ब्ल्याकमेल’ गर्दै ट्रयापमा पारेर एक युवतीलाई शुक्रबार विराटनगर बोलाएका थिए । तिनै युवतीलाई भेट्न आएका बेला रवि कुमार पक्राउ परेका हुन् ।
अश्लील भिडियो सामाजिक सञ्जालमार्फत सार्वजनिक गरिदिने धम्की दिने गर्न थालेपछि न्याय माग्दै पीडितहरू प्रहरीसमक्ष पुगेको जनाइएको छ ।
रवि कुमारले सामाजिक सञ्जालमा अश्लिल भिडियो ‘अपलोड’ गरिदिने धम्की दिँदै आफ्ना लागि हवाई टिकट काट्न र होटलका कोठा बुक गर्न लगाउने गरेको प्रहरीको भनाइ छ ।
त्यसबापतको सबै खर्च उनले युवतीलाई नै तिराउने गरेको पाइएको छ ।
रवि कुमारले दिएको तनावका कारण कतिपय युवतीहरू आत्महत्या गर्ने मनस्थितिमा समेत पुगेको प्रहरीले जनाएको छ ।
काठमाडौं प्रहरी परिसरले जबरजस्ती करणी मुद्दा चलाउन उनीमाथि थप अनुसन्धान अघि बढाउने छ ।
