विराटनगर । कोसी प्रदेशको आन्तरिक मामिला तथा कानुन मन्त्रालयअन्तर्गतको ‘हामी स्वयमसेवी अभियान’ को निर्देशकमा निश्कल राई नियुक्त भएका छन् ।
मन्त्रालयले बुधबार सूचना जारी गर्दै उक्त अभियानको निर्देशकमा इलामको सूर्यदय नगरपालिका-४ का राई नियुक्त भएको जानकारी दिएको छ ।
विपद् व्यवस्थापन, लागूऔषध दुर्व्यसनी न्युनीकरण तथा नैतिक शिक्षामा केन्द्रित रहेको अभियानका लागि मंसिर २१ गते मन्त्रालयले विज्ञापन खुलाएको थियो ।
पुस ११ गते कार्ययोजना लेखन र पुस १२ गते अन्तर्वार्ताका माध्यमबाट मंगलबार (आज) निर्देशकमा राईलगायत १४ वटै जिल्लाका संयोजक नियुक्त गर्ने निर्णय भएको मन्त्रालयले जनाएको छ ।
यस्तै, उक्त अभियानको मोरङ संयोजकमा विराटनगर महानगरपालिका-३ का युवा समाजसेवी पाश्चर घिमिरे नियुक्त भएका छन् ।
झापा संयोजकमा अर्जुनधारा-७ का सञ्जीव पौडेल, इलाम संयोजकमा इलाम नगरपालिका-११ का धनबहादुर तामाङ नियुक्त भएका छन् ।
यसैगरी, पाँचथरमा चन्द्रबहादुर माङ्मु, ताप्लेजुङमा लोकेश लिम्बू, तेह्रथुममा दीपक कटेल, धनकुटामा विकास घिमिरे, सोलुखुम्बुमा अम्बिका राई, ओखलढुङ्गामा रेवतीरमण सुनुवार, खोटाङमा नेत्रबहादुर राउत, उदयपुरमा थीरबहादुर दाहाल, संखुवासभामा कल्पना बराल, भोजपुरमा शुभलाल राई र सुनसरीमा विराटनगरकी मीना राजवंशी चयन भएका छन् ।
कोशी प्रदेशका सामुदायिक तथा संस्थागत विद्यालयमा कक्षा ९ देखि १२ सम्म अध्ययनरत किशोर तथा किशोरीलाई लागूपदार्थ दुर्व्यसनको कुलत तथा प्रयोगबाट निरुसाहित गर्ने, उनीहरूलाई नैतिक, जिम्मेवार, तथा असल नागरिकका रूपमा सामाजिक दायित्व निर्वाह गर्ने र विपद् ब्यवस्थापन सम्बन्धमा सचेतनामूलक कार्यक्रम सञ्चालन गर्ने उद्देश्यले उक्त अभियानको थालनी भएको हो ।
वर्तमान मुख्यमन्त्री केदार कार्की अघिल्लो कार्यकालमा आन्तरिक मामिला तथा कानुन मन्त्री हुँदा यस अभियानको थालनी भएको थियो ।
