विराटनगर । विराटनगर महानगरपालिकाले शुल्क नतिर्दा सयौं विद्यार्थीलाई परीक्षा दिनबाट बञ्चित गर्ने विद्यालयलाई कारबाही गर्ने चेतावनी दिएको छ ।
महानगरपालिकाका शिक्षा महाशाखा प्रमुख कृष्ण भट्टराईले परीक्षा शुल्क नतिरेको भन्दै विद्यार्थीलाई जाँच दिन नदिने विराटनगर-९ को सरस्वती माध्यमिक विद्यालयलाई कारबाही गर्ने चेतावनी दिए ।
शुल्क नबुझाएको भन्दै एक सयभन्दा बढी विद्यार्थीलाई विद्यालयको आन्तरिक परीक्षामा सामेल हुन नदिइएपछि महानगरले कारबाहीको चेतावनी दिएको हो ।
स्कुल प्रशासनले ती विद्यार्थीहरूलाई आइतबार परीक्षा दिनबाट बञ्चित गराएको थियो ।
यसरी परीक्षा शुल्क नबुझाएको भनेर विद्यार्थीलाई परीक्षाबाट बञ्चित गराउने काम गलत भएको भट्टराईको भनाइ छ ।
आफूले तत्काल परीक्षा दिनबाट बञ्चित भएका विद्यार्थीलाई जाँचमा सामेल गराउन निर्देशन दिएको बताउँदै उनले सोमबार (आज) विद्यालयमा निरीक्षण गर्ने बताए ।
यदि परीक्षामा शुल्क नबुझाएको कारणले परीक्षाबाट बञ्चित गराएको पाइए विद्यालय प्रशासनलाई कारबाहीको दायरामा ल्याउने उनले बताए ।
शिक्षा ऐनअनुसार पनि सामुदायिक विद्यालयले विद्यार्थीहरूबाट कुनै प्रकारको पनि शुल्क नउठाउनू भनेर प्रष्ट बताएको उनले बताए ।
यता, विद्यालयकी प्राचार्य अनिता नेपालले भने परीक्षा हलबाट निकालिएका करिब ५० जना विद्यार्थीको ७५ प्रतिशत हाजिरी नपुगेको पाइएपछि अभिभावक लिएर आउनु भन्दै घर पठाएको बताइन् ।
उनीहरूको आइतबारको परीक्षा अन्तिम दिन लिने तयारी गरिएको उनको भनाइ छ ।
विद्यालयले विद्यार्थीबाट स्वच्छाले सहयोग शुल्क लिएको प्राचार्य नेपालले बताइन् ।
भएको के थियो ?
विद्यालयले दोस्रो त्रैमासिक परीक्षा १९ पुसबाट लिन सुरु गरेको छ ।
पहिलो दिन अंग्रेजी र दोस्रो दिन नेपालीको परीक्षा भइसकेको छ ।
तेस्रो दिनको आइतबार गणित विषयको परीक्षामा शुल्क नबुझाएपछि परीक्षा दिनबाट विद्यालयले रोक लगाएको हो ।
ती विद्यार्थीले बिहीबार अंग्रेजी र शुक्रवार नेपाली विषयको परीक्षा भने दिएका थिए ।
परीक्षा दिनबाट बञ्चित भएपछि केही विद्यार्थी रुँदै घर फर्किएका थिए ।
उनीहरूको माया लागेपछि केही शिक्षक मिलेर पैसा उठाएर ४-५ जना विद्यार्थीको परीक्षा शुल्क तिरिदिएका थिए ।
त्यसपछि ती विद्यार्थीले परीक्षा दिए । तर, नबुझाउनेहरूले परीक्षाबाट बञ्चित हुनुपरेको थियो ।
सरस्वती माविका व्यवस्थापक समितिको अध्यक्ष विराटनगर महानगरपालिका मेयर नागेश कोइरालाका काकी अजिता कोइराला रहेकी छिन् ।
यो विद्यालयमा कक्षा ६ देखि कक्षा १२ सम्म पढाइ हुने गर्दछ ।
अहिले परीक्षा ६ देखि १० सम्म भएको हो ।
परीक्षा करिब साढे पाँच सय विद्यार्थी रहेका छन् ।
शिक्षा ऐनअनुसार सरकारी विद्यालयले विद्यार्थीहरूसँग शुल्क उठाउन नमिल्ने प्रस्ट उल्लेख गरेको छ ।
तर, सरस्वतीसहित यहाँका अधिकाशं सामुदायिक विद्यालयले विद्यार्थीबाट विभिन्न शीर्षकमा शुल्क असुल्दै आएको छ ।
नेपाली र अंग्रेजी माध्यमबाट पढाई हुने सरस्वतीमा कक्षा ६ देखि १० सम्मका विद्यार्थीलाई परीक्षा शुल्क बापत डेढ सयदेखि दुई सय रुपैयाँसम्म उठाउने गरेको छ ।
यसरी गैरकानुनी तरिकाले परीक्षाको नाममा लिएको शुल्क नबुझाउँदा विद्यार्थी परीक्षा हलबाट निकालेर घर पठाएको पाइएको हो ।
