चतरा । कोसी प्रदेशका पर्यटन, वन तथा वातावरण मन्त्री गणेश उप्रेती ‘सुशील’ ले आगामी चैतबाट सुरु हुने महाकुम्भ मेलाको तयारीबारे जानकारी लिएका छन् ।
बुधबार साँझ कुम्भ मेलास्थल बराहक्षेत्र नगरपालिका-१ चतरा पुगेर मन्त्री उप्रेतीले चैत २७ गतेदेखि हुन आँटेको कुम्भ मेलाको तयारीबारे जानकारी लिएका हुन् ।
नेपालका प्रथम जगतगुरु बालसन्त मोहनशरण देवाचार्यले मन्त्री उप्रेतीलाई मेलास्थल घुमाउँदै कुम्भ मेलाको तयारी तीव्रताका साथ अगाडि बढाइएकाे जानकारी दिए ।
मेलास्थलमा तयार गर्नुपर्ने भौतिक संरचनाको निर्माण, विद्युत्, खानेपानी, सरसफाइको व्यवस्थापन, सुरक्षा प्रबन्ध, बसोबासस्थल, प्रचारप्रसार, विशिष्ठ व्यक्तिहरूको निमन्त्रणालगायतका विषयमा उनले जानकारी गराएका थिए ।
साथै, उनले आवश्यक तयारीका लागि प्रदेश सरकारसँग समन्वय र सहयोगका लागि प्रस्ताव राखेका थिए ।
मन्त्री उप्रेतीले कुम्भ मेला प्रदेशमा धार्मिक पर्यटक भित्र्याउने ठुलो आधार भएको जनाउँदै यसलाई भव्यताका साथ आयोजना गर्न सुझाव दिए ।
कुम्भ मेलाको सफल आयोजनाले देश-विदेशमा रहेको हिन्दुहरूको मात्र नभएर संसारकै ध्यान खिच्न सक्ने जनाउँदै मन्त्री उप्रेती यसको तयारीमा आफ्नो साथ-सहयोग रहने प्रतिबद्धता जनाए ।
चतरामा १२-१२ वर्षमा महाकुम्भ मेला र ६-६ वर्षमा अर्ध कुम्भमेला लाग्नै आएको छ । वालसन्तको अगुवाईमा २०५९ साल वैशाख १ गतेबाट चतरामा कुम्भ मेला लाग्न थालेको हो ।
यसपालि चैत २७ गतेदेखि २०८१ वैशाख २७ सम्म कुम्भमेला लाग्ने छ । मेलामा भक्तजनलाई आमन्त्रण गर्ने उद्देश्यका साथ वालसन्तले १५ दिने पदयात्रा गरेका थिए ।
कोसी प्रदेशका मुख्यमन्त्री केदार कार्कीले सो पदयात्राको औपचारिक उद्घाटन गरेका थिए ।
उक्त पदयात्राले बराहक्षेत्रसँगै आसपासका धार्मिकस्थलको पहिचान गरी सम्भावनाको अध्ययन गर्ने र सुनसरी, उदयपुर र धनकुटामा रहेका धार्मिक क्षेत्रलाई कसरी विकास गर्न सकिन्छ भनेर एउटा महत्त्वपूर्ण अध्ययन भएको वालसन्तको भनाइ छ ।
