इलाम । इलामको माई नगरपालिका–१० लुम्बाकका ६४ वर्षीय दुर्गाप्रसाद शर्मा तिम्सिनाले ४० वर्ष भारतमा जेलजीवन बिताए ।
दुर्गाप्रसादलाई २०७७ साल चैतमा भारतको कोलकाता जेलबाट छुटाएर घर ल्याइएको थियो ।
उनी २० वर्षे उमेर छँदा २०३७ साल माघमा घर छाडी बेपत्ता भएका थिए ।
घर छाडेकै वर्ष भारत दार्जिलिङमा एक महिलाको हत्या आरोपमा जेल परेका उनी २०७७ साल फागुनमा भारतकै कोलकातास्थित दमदम कारागारमा फेला परेका थिए ।
सन् १९८१ मै जेल परेका दुर्गाप्रसादको मुद्दामा चार दशकसम्म कुनै सुनुवाइ भएन ।
यसरी लामो समय जेलमै कोचिएको थाहा पाएपछि कोलकाता हाइकोर्टले महावाणिज्य दूतावासमार्फत ६/६ महिनामा दुर्गाप्रसादको स्वास्थ्य अवस्थाबारे जानकारी गराउने गरी २०७७ चैत ७ मा रिहा गरेको थियो ।
विभिन्न सङ्घसंस्थाको पहलमा उनलाई २०७७ साल चैत ८ मा आफ्नी वृद्धा आमासहितको परिवार रहेको लुम्बाकस्थित घर ल्याइएको थियो ।
अहिले उनकी आमाको निधन भइसकेको छ ।
इलामस्थित जिल्ला प्रशासन कार्यालयले दुर्गाप्रसादलाई घर आएपछि नागरिकता प्रदान गरेको थियो ।
कोसी प्रदेश सरकारले उनको केही उपचार निःशुल्क गरिदिएको थियो ।
उनको घर रहेको माई नगरपालिकाले आर्थिक अवस्था कमजोर रहेका दुर्गाप्रसादको जीवन सहज बनाउन ५० हजार रुपैयाँ नगद प्रदान गरेको थियो ।
उपचारपछि घर आएका दुर्गाप्रसादमा पुनः सामाजिकीकरणको समस्या दोहोरिएको थियो ।
लामो समय जेलमा रहेको र यातना पाएका कारण मानसिक रूपमा विक्षिप्त बनेका दुर्गाप्रसादको व्यवहार निकै असहज भएपछि उनलाई उपचारमा लगिएको थियो ।
४० वर्षपछि २०७७ सालमा स्वदेश फर्काइएका तिम्सिना उपचारको रकम तिर्न नसक्दा अस्पतालमै बस्न बाध्य भएका छन् ।
शर्मालाई गत वर्ष परिवारले चितवनको खैरहनी नगरपालिका–११ स्थित ब्युटिफुल माइन्ड इन्स्टिच्युट अफ् साइक्याट्रिनमा उपचारका लागि भर्ना गराएका थिए ।
तर, अस्पताललाई बुझाउने पैसा नभएपछि उनी करिब छ महिनादेखि चितवनको एक अस्पतालमा बन्धकजस्तै बनेका छन् ।
६ महिनाअघि नै उनको स्वास्थ्यमा सुधार आएको चिकित्सकले बताएका थिए ।
तर, चार लाख रुपैयाँ उपचार अस्पताललाई बुझाउन नसक्दा घर ल्याउन नसकिएको परिवारजनले गुनासो गरेका हुन् ।
दुर्गाप्रसादका भतिजा गोपाल तिम्सिनाले आर्थिक अभावले गर्दा ठुलो बुबालाई अस्पतालमै राख्नुपरेको दुखेसो गरे ।
गोपालले दुर्गाप्रसादको थप उपचारका लागि काठमाडौँलगायत विभिन्न स्थानबाट सहयोगको प्रस्ताव आइरहेको बताए ।
उपचारमा सात लाख १५ हजार रुपैयाँ खर्च भएको बताउँदै उनले बाँकी चार लाख १५ हजार रुपैयाँ नहुँदा ठूलोबुबा अस्पतालमै बस्नुपरेको उनको दुखेसो गरेका छन् ।
थप उपचारका लागि इलामस्थित मानवअधिकार मञ्चले समेत दुर्गाप्रसादलाई अस्पतालसम्म लैजान सहयोग गरेको थियो ।
ब्युटिफुल माइन्ड इन्स्टिच्युट अफ् साइक्याट्रिनका अध्यक्ष डा गिरिराज भन्टानाले दुर्गाप्रसादको स्वास्थ्यमा सुधार आइसकेको बताए ।
दुर्गाप्रसाद जेलबाट छुटेर आएपछि उनीमा मानसिक समस्या देखिएकाले विराटनगरमा समेत १७ दिन उपचार गरिएको थियो ।
विराटनगरमा गरिएको उपचारले समेत निको नभएपछि चितवन लगिएको थियो ।
