ताप्लेजुङ । ताप्लेजुङस्थित प्रसिद्ध तीर्थस्थल पाथीभरा (मुक्कुमलुङ) मा भक्तजनले एक सय ८६ तोला सुन चढाएका छन् ।
पाथीभरा क्षेत्र विकास समितिले बिहीबार पत्रकार सम्मेलन गरी मङ्सिर मसान्तसम्ममा एक सय ८७ तोला ६ लाल सुन चढाएको बताएको छ ।
समितिका कार्यकारी निर्देशक हाङ्बाङका अनुसार ८६ तोला ९३ लाल सुन शुद्ध अर्थात् रिफाइन गरिएको रहेको छ ।
बाँकी ९८ तोला ४१ लाल रिफाइन गरिएको सुन रहेको समितिले जानकारी दिएको छ ।
त्यस्तै, हालसम्म रिफाइन नभएको चाँदी ९२ किलोग्राम ६५० ग्राम रहेको पनि समितिले जानकारी दिएको छ ।
अन्य धातुमा तामा छ हजार ५३९ किलोग्राम ७७५ ग्राम र विभिन्न धातुको घण्टी १६ हजार ३६८ किलोग्राम रहेको पनि समितिले जनाएको छ ।
भक्तजनले चढाएको सुन र चाँदीलाई चाँडै रिफाइन गरी बिक्रीसहित व्यवस्थापन गर्ने योजना रहेकोसमेत समितिले जानकारी दिएको छ ।
यसैगरी, पाथीभरामा कुल आठ करोड ४५ लाख ९४ हजार ३३६ रुपैयाँ भेटी रकम सङ्कलन भएको समितिका कार्यकारी निर्देशक प्रजिन हाङ्बाङले जानकारी दिए ।
उनका अनुसार पछिल्लो दुई महिना अर्थात् कात्तिक र मङ्सिर महिनामा मात्र ६८ लाख ११ हजार ११० रुपैयाँ भेटी सङ्कलन भएको छ ।
कुल सङ्कलित भेटी रकममध्ये चालू आर्थिक वर्षयता मङ्सिर मसान्तसम्ममा १० लाख ७० हजार ७८७ रुपैयाँ खर्च भएको पनि हाङ्बाङले जानकारी दिए ।
उनका अनुसार सेवा करार तथा ज्यालादारीमा कार्यरत कर्मचारीको पारिश्रमिक, रकम ढुवानी तथा व्यवस्थापन, सुरक्षाकर्मीको खाजा, योजना अनुगमन लगायतमा खर्च भएको छ ।
उनले खर्च कटाएर बाँकी आठ करोड ३५ लाख २३ हजार ५४८ रुपैयाँ बैङ्कमा मौज्दात रहेको बताए ।
समितिका अनुसार नेपाल बैङ्क लिमिटेड, लक्ष्मी सनराइज बैङ्क, सानिमा बैङ्क, प्रभु बैङ्क र एनएमवि बैङ्कका शाखामा रकम मौज्दात रहेको छ ।
उक्त बैङ्कमा सञ्चालित मुद्दती खातामा ६ करोड ८८ लाख रुपैयाँ मौज्दात रहेको र मौज्दात रकमको पछिल्लो दुई महिनाको ब्याज मात्र दुई लाख ५२ हजार ४४० रुपैयाँ रहेको समितिले जनाएको छ ।
यता, पाथीभराको थप प्रचारप्रसार र दर्शनार्थीका लागि देवीको दर्शनलाई सहज बनाउने कार्यमा पाथीभरा क्षेत्र विकास समिति निरन्तर लागिपरेको समिति अध्यक्ष रक्की थेबेले बताए ।
अधिकतम् भक्तजन आउनेगरी दर्शन यात्रालाई अझ सहज बनाउने, भेटीपातीलाई थप व्यवस्थित गर्ने र सबैसामु पारदर्शी हुनेगरी समितिले योजना बनाएर काम गर्न सुरु गरेको पनि अध्यक्ष थेबेको भनाइ छ ।
समितिको दायित्वलाई प्रभावकारी बनाउन जनशक्ति तथा कार्यालय व्यवस्थापनको थप काम भइरहेको समितिले जानकारी दिएको छ।
