विराटनगर । मोरङ पथरी शनिश्चरेमा रहेको अन्नपूर्ण सेकेन्डरी स्कुलका निश्हित विश्वकर्मा पाँचौं संस्करणको एसबिएससी सिङ्गिङ स्टारको उपाधि जितेका छन् ।
विराटनगरस्थित आरोहण गुरुकुलमा शनिबार सम्पन्न भएको फाइनलमा १३ जना प्रतिस्पर्धीलाई पछि पार्दै निश्हितले सिङ्गिङ स्टारको उपाधि जितेका हुन् ।
संस्थागत विद्यालय बचत तथा ऋण सहकारी संस्था लिमिटेडले आयोजना गरेको प्रतियोगिताको फर्स्ट रनरअप दुई जना घोषित भए ।
उर्लाबारीस्थित सुनगाभा सेकेन्डरी स्कुलका छेसाङ तामाङ र उर्लाबारीको पार्लेन्स सेकेन्डरी स्कुलका प्रशुनेहा ठाकुर भए ।
बराबरी अङ्क ल्याएपछि उनीहरूलाई फर्स्ट रनअरप घोषित गरेको हो ।
प्रतियोगिताको सेकेन्ड रनरअप पथरीस्थित एभरेस्ट स्कुलकी रोशनी गुरुङ घोषित भइन् ।
प्रतियोगिताको विजेताले नगद २५ हजार, द्वितीयले १५ हजार, तृतीयले १० हजार र सान्त्वनाले जनही पाँच हजार रुपैयाँ प्राप्त गरेका छन् ।
प्रतियोगिताको निर्णायकमा गायक साजन राई रहेका थिए ।
‘आवज तपाईंको, गौरव राष्ट्रको, देन निजी विद्यालयको’ भन्ने मूल नाराको साथ प्रत्येक वर्ष एसबीएससी सिङ्गिङ स्टार हुँदै आएको छ ।
प्रतियोगितामा विजेता हुनेहरूलाई कार्यक्रमको प्रमुख अतिथि विराटनगर महानगरपालिका प्रमुख नागेश कोइरालाले पुरस्कार वितरण गरेका थिए ।
झण्डै तीन सय विद्यार्थीहरूबाट विभिन्न चरणको अडिसन राउन्डबाट छनोट भएर फाइनलमा १३ जना पुगेको संस्थागत विद्यालय बचत तथा ऋण सहकारी संस्थाका अध्यक्ष मोहन बुढाथोकीले जानकारी दिए ।
कार्यक्रममा बोल्दै प्रमुख अतिथि विराटनगर महानगरपालिका प्रमुख कोइरालाले विद्यार्थीहरूको प्रतिभा प्रस्फूटन गर्न यस्तो प्रतियोगिताले ठुलो सहयोग पुग्ने बताए ।
आगामी दिनमा पनि यस्तो कार्यक्रमलाई निरन्ता दिनुपर्ने उनले बताए ।
कार्यक्रममा हिसानका केन्द्रीय उपाध्यक्ष भेषराज पोखरेल, प्याब्सन कोसी प्रदेशका अध्यक्ष टीकाराम पुरी, अभिभाव सङ्घ कोसी प्रदेशका अध्यक्ष देवी पन्थी, संस्थागत विद्यालय बचत तथा ऋण सहकारी संस्थाका अध्यक्ष मोहन बुढाथोकी, पूर्वअध्यक्ष ईन्द्र राईलगायतले बोलेका थिए ।
