कानेपोखरी । मोरङको कानेपोखरीमा बसको चक्काले ठोकिएर एक जनाको मृत्यु भएको छ ।
मृत्यु हुनेमा कानेपोखरी-६ रमाइलोका ३० वर्षीय वीरेन्द्र पौडेल रहेको प्रहरीले जनाएको छ ।
पूर्व–पश्चिम राजमार्गअन्तर्गत कानेपोखरी बजारमा मङ्गलबार बिहान ९ बजेतिर भएको दुर्घटनामा उनको मृत्यु भएको प्रहरीले जनाएको छ ।
रमाइलोबाट कन्काईमाइ दर्शन गर्न कानेपाखरी बस स्टेन्ड पुगेका पौडेललाई गुडिरहेको बसको पछाडिपट्टिका चक्का खुस्किएर ठक्कर लागेको थियो ।
पश्चिमबाट पूर्वतर्फ जाँदैगरेको प्र.१-०१-०० ख-३९२२ नम्बरको यात्रुवाहक बसको बायाँतर्फका पछाडिका दुवै चक्का खुस्किएका थिए ।
तीव्र गतिको बसका चक्का खुस्किँदा ट्याम्पोबाट ओर्लिँदै गरेका पौडेललाई ठक्कर दिएको थियो ।
गम्भीर घाइते पौडेललाई तत्काल पथरी अस्पताल लगिएकोमा त्यहाँ उपचार हुन नसकेपछि थप उपचारका लागि विराट नर्सिङ होम विराटनगर पठाइएको थियो ।
नर्सिङ होममा उपचारका क्रममा दिउँसो १ बजेतिर मृत्यु भएको कानेपोखरी प्रहरी चौकीका प्रहरी सहायक निरीक्षक गुणराज पोखरेलले जानकारी दिए ।
पौडेल पुस १३ गते वैदेशिक रोजगारीका लागि दक्षिण कोरिया जाने तयारीमा रहेका थिए ।
दक्षिण कोरिया जानुअघि तीर्थाटनका लागि कन्काईमाई जान आँटेका थिए ।
