झोराहाट ।
मोरङको ग्रामथान गाउँपालिका –२ झोराहाटस्थित जनक मेमोरियल सेकेन्डरी बोर्डिङ स्कुलले प्रदेश सांसदसँग विद्यार्थी नामक कार्यक्रम गरेको छ ।
बुधबार विद्यालयले कोसी प्रदेशसभा सदस्यद्वय जयप्रकाश चौधरी र ललिताकुमारी चौधरीसँग अन्तरक्रियात्मक कार्यक्रम सांसदसँग विद्यार्थी कार्यक्रम गरेको हो ।
कार्यक्रमका प्रमुख अतिथि तथा प्रदेश सांसद जयप्रकाश मोरङ क्षेत्र नम्बर ४ (क) मा नेकपा एमालेबाट निर्वाचित प्रदेशसभा सदस्य हुन् भने ललिता एमालेकै समानुपातिक सांसद हुन् ।
उनीहरूले प्रदेशसभा सञ्चालन, सदनका समितिहरूको बनोट, बैठकको शून्य समय र विशेष समयलगायतबारे विद्यार्थीहरूलाई जानकारी गराएका थिए ।
सांसद जयप्रकाश चौधरीले जनक मेमोरियलले विद्यालयको शैक्षिक गतिविधिसँगै अतिरिक्त गतिविधिअन्तर्गत राम्रो अभियानको थालनी गरेको भन्दै प्रशंसा गरे ।
आजका कर्णधार विद्यार्थी भोलिका समाजसेवी, राजनीतिज्ञलगायत उच्च ओहदामा पुग्न सक्ने औंल्याउँदै उनले सांसद र सदनका विषयमा विद्यार्थीहरूलाई जानकारी दिइनुपर्ने धारणा राखे ।
यस्तै, सांसद ललिता चौधरीले विद्यार्थी र सांसदबीचको अन्तरक्रियाले विद्यार्थीमा निहीत क्षमता अझ निखारिने मात्र नभएर सांसदहरूलाई जबाफमुखी हुन सघाउ पुग्ने उल्लेख गरिन् ।
जनक मेमोरियलमा कक्षा १० मा अध्यनरत छात्राहरूले विभिन्न विषयमा आफ्ना उत्सुकता सांसदसमक्ष राखेका थिए ।
प्रदेशलाई समृद्धिको बाटोतर्फ अग्रसर बनाउन सांसदको भूमिका कस्तो रहने र छात्राहरूलाई सेनेटरी प्याडको व्यवस्था गर्नुपर्ने विद्यार्थीहरूको धारणा थियो ।
जवाफमा सांसद जयप्रकाशले आफूहरूले यस्ता विषयहरूमा सदनमा राख्ने गरेको सुनाउँदै चाँडै नै सम्बोधन हुनेमा आफूहरू विश्वस्त रहेको सुनाए ।
जनक मेमोरियलले प्रदेश सांसदसँग विद्यार्थी कार्यक्रमलाई निरन्तरता दिने जनाएको छ ।
प्रदेशसभा भवनमै लगेरविद्यार्थीलाई सदनबारे प्रत्यक्ष जानकारी दिने विद्यालयको योजना रहेको छ ।
कार्यक्रममा विद्यालयका लेखा अधिकृत आलोक अधिकारीले स्वागत मन्तव्य राखेका थिए भने सामाजिक शिक्षा अध्यापन गराउने शिक्षक सुरज अधिकारीले कार्यक्रम सञ्चालन गरेका थिए ।
कार्यक्रमका अध्यक्षसमेत रहेका विद्यालयका प्रधानाध्यापक सुनील भगतले कार्यक्रमको समापन गरेका थिए ।
