आउँदाे स्थानीय तहको निर्वाचनलाई मध्यनजर गर्दै जिल्ला प्रशासन कार्यालय झापाले व्यक्तिका नाममा रहेका निजी हातहतियार प्रशासनलाई बुझाइदिन आग्रह गरेको छ ।
निर्वाचनलाई भयरहित, शान्तिपूर्ण र निष्पक्ष बनाउने उद्देश्यले जिल्ला प्रशासन कार्यालय झापाले आज एक सूचना जारी गरी झापा जिल्लाभित्र इजाजत प्राप्त गरी विभिन्न व्यक्तिको नाममा रहेका हातहतियार बुझाउन आग्रह गरेको हो ।
आगामी वैशाख ३० गते हुने स्थानीय तहको निर्वाचनकाे सुरक्षालाई मध्यनजर गर्दै गरिएकाे अनुराेध अनुसार व्यक्तिका नाममा रहेका हातहतियार नजिकको प्रहरी एकाइमार्फत जिल्ला प्रहरी कार्यालयमा बुझाउन भनिएकाे छ ।
सहायक प्रमुख जिल्ला अधिकारी रुद्रप्रसाद न्यौपानेले जानकारी दिए अनुसार सूचना जारी गरिएको १५ दिनभित्र हातहतियार बुझाइ सक्नु पर्नेछ ।
जिल्ला प्रशासन कार्यालयका सहायक प्रमुख जिल्ला अधिकारीले बुझाइएकाे हातहतियार निर्वाचन सम्पन्न भएपछि सम्बन्धित व्यक्तिलाई नै फिर्ता गरिने जानकारी दिएका छन् ।
नेपाल सरकारले २०७९ साल वैशाख ३० गते एकै चरणमा नेपालभर स्थानीय तहकाे निर्वाचन गर्ने घाेषणा गरिसकेकाले सम्बन्धित निकायले साेही अनुसार आ–आफ्नाे तयारी गरिरहेका छन् ।
जिल्ला प्रशासन कार्यालय झापाद्वारा जारी गरिएकाे सूचना
.jpg)
