पूर्वप्रधानमन्त्री एवम् जसपा नेता बाबुराम भट्टराई र नेकपा एमाले नेता भीम रावलबीच जुहारी चलेको छ । अमेरिकी सहायता परियोजना (एमसिसी) लाई लिएर गरेको टिप्पणीका कारण दुवै नेताबीच सामाजिक सञ्जाल ट्विटरमा जुहारी चलेको हो ।
सोमबार एमसिसीबारे स्मृतिपत्र सार्वजनिक गर्दै रावलले बाबुरामले गोप्य एमसिसी सम्झौता गरेको आरोप लगाएपछि बाबुरामले त्यसको जवाफ सामाजिक सञ्जालमा फर्काएका थिए । त्यसकैको जवाफ फर्काउँदै नेता रावलले भट्टरार्ईलाई घोचपेच गरेका हुन् ।
उनीहरूबीचको जुहारी अहिले व्यक्तिगत तहमा पुगेको छ । बाबुरामले रावललाई नक्कली विद्यावारिधिको पदवीवाला भएको अरोप लगाएपछि रावलले पनि त्यसको जवाफ दिएका छन् ।
‘यी कणले पीएचडी गरेको भनेर नाउको अगाडि ‘डा.’ पनि झुन्ड्याउँछन्,’ भट्टराईले ट्वीटरमा लेखेका छन्, ‘विद्यावारिधि गर्दा कसैबारे कुनै दाबी गरियो भने त्यसको स्रोत/मिति/स्थान खुलाउनुपर्छ । उनले दाबी गरेजस्तो ‘बाबुरामले गोप्य रूपमा एमसिसी सम्झौता गरेको हो’ भने कहिले, कहाँ, कसरी खुलाउनुपर्दैन ? कि यी नक्कली पिएचडी हुन् ?’
रावलले ट्वीटको जवाफमा लेखेका छन्, ‘बाबुरामजी प्रम हुँदा २०६८ मा चुपचाप एमसिसीसँग पत्राचार गरी टोली गठन गरिएको तथ्य मैले उल्लेख गरेको छु । त्यो बेला दलीय सहमतिबाट मात्र त्यस्तो गर्नसकिन्थ्यो तर जानकारीसम्म गराइएन । पिएचडी नक्कली सीमापारी हुने गरेको सधैँ चर्चा हुन्छ, त्रि.वि.वि. बाट पीएचडी कसैको नक्कली हुने चर्चा नै हुन्न ।’
एमसिसीकाे विपक्षमा देखिएका एमाले नेता रावलले एमसिसी सम्झाैता राष्ट्रिय हितमा नरहेकाले संसदबाट अनुमाेदन नगराउन ध्यानाकर्षण गर्दै आइरहेका छन् ।
यता पूर्वप्रधानमन्त्री समेत रहेको भट्टराई भने आलटाल नगरी एमसिसीलाई सर्वसम्मतिले संसदबाट पारित गरिनुपर्छ भन्ने पक्षमा छन् । चीन, भारत र अन्य राष्ट्रका अनुदान चल्ने तर अमेरिकी पुँजी अछुत हुने भन्दै उनले प्रश्न समेत गरिरहेका छन् ।
