पाकिस्तानको पञ्जाब प्रान्तमा १४ वर्षीय बालकले आफ्नो परिवारका चार सदस्यको हत्या गरेका छन् ।
पब्जी खेलको प्रभावका कारण आफ्नो आमा, एक दाजु र एक दिदी र एक बहिनीको गोली हानी हत्या गरेको राजधानी लाहौरका प्रहरीले जनाएको हो ।
प्रहरीका अनुसार अघिल्लो हप्ता काहना इलाकामा स्वास्थ्यकर्मी ४५ वर्षीया नाहिद मुबारक, उनका २२ वर्षीय छोरा तैमुर, १७ र ११ वर्षीया छोरीको शव भेटिएको हो ।
नाहिदका १४ वर्षीय छोरा सुरक्षित रहेको र उनी नै हत्यारा भएको प्रहरीले जनाएको छ । पब्जी खेलको प्रभावमा आमा र परिवारका अन्य सदस्यको हत्या गरेको ती बालकले स्वीकार गरेका छन् ।
प्रहरी अनुसन्धानमा लामो समयसम्म लगातार अनलाइन खेलले उनमा मनोवैज्ञानिक समस्या उत्पन्न भएको खुलेको छ ।
प्रहरीले नाहिदको सम्बन्धविच्छेद भएको र उनका १४ वर्षीय छोरा पढाइ छोडेर दिनभर पब्जी खेल्नमा व्यस्त रहेको बताएको छ ।
दिनभर पब्जी खेल्ने गरेकाले आमाले गाली गरेपछि सुतिरहेको बेलामा आमाको पेस्तोल निकालेर उनले परिवारका सदस्यको हत्या गरेका थिए । बालक चिच्याएपछि छिमेकीले प्रहरीलाई खबर गरेका थिए ।
इजाजतपत्र प्राप्त पेस्तोल नाहिदले आफ्नो परिवारको सुरक्षाको लागि लिएकी थिइन् ।
