टेस्लाका मालिक एलन मस्कको स्पेस एक्सले कम्पनीले प्रक्षेपण गरेको रकेट चन्द्रमामा ठोक्किने भएको छ ।
फाल्कोन-९ बुस्टर रकेट अनियन्त्रित भइ चन्द्रमामा ठोकिएर ध्वस्त हुन लागेको जनाइएको छ । सन् २०१५ मा प्रक्षेपण गरिएको उक्त रकेटले आफ्नो मिसन पूरा गरे पनि इन्धन अभावमा पृथ्वीमा फर्कन नपाएको बिबिसीले जनाएको छ ।
स्पेस वेदर स्याटलाइटलाई पठाउने आफ्नो मिसन पूरा गरेपनि सात वर्ष देखि अन्तरिक्षमै अड्किएपछि उक्त रकेट फोहोरको टुक्रा बनेको थियो ।
खगोलविद् जोनाथान म्याकडोवेलले यो घटनालाई पहिलो पटक अनियन्त्रित रकेट चन्द्रमामा ठोक्किएको रूपमा लिने जनाएका छन् ।
चन्द्रमामा ठोक्किए पनि यसबाट खासै क्षति नहुने बताइएको छ । इन्धन सकिएपछि उक्त रकेटलाई पृथ्वी,चन्द्रमा र सूर्यका गुरुत्वाकार्षण बलले आफूतिर तान्ने गरेको र यसले रकेटको मार्गलाई झनै अनियन्त्रित बनाएको छ ।
यो रकेटलाई सात वर्षअघि पृथ्वीको माथिल्लो अर्विटबाट छाडिएको थियो ।
