प्राविधिक शिक्षा तथा व्यावसायिक तालिम परिषद् (सिटिइभिटी) का आसन्न सबै परीक्षा स्थगित भएका छन् ।
कोरोना सङ्क्रमणका कारण सबै परीक्षा स्थगन गरिएको सिटिइभिटी परीक्षा नियन्त्रण कार्यालयले जनाएको छ ।
सिटिइभिटीको मङ्गलबार बसेको बैठकले परीक्षा सञ्चालनको पूर्वतयारी अवस्थामा रहेका सम्पूर्ण परीक्षाहरू अर्को सूचना जारी नभएसम्मका लागि स्थगित गर्ने निर्णय गरेको हो ।
सिटिइभिटी परीक्षा नियन्त्रण कार्यालयका उपनियन्त्रक डिलबहादुर घिमिरेले परीक्षा केन्द्रमा परीक्षासँग सम्बन्धित विद्यार्थी र कर्मचारीमा कोरोना सङ्क्रमण हुनसक्ने भन्दै सम्पूर्ण परीक्षा अर्को सूचना जारी नभएसम्मका लागि स्थगित गरिएको जानकारी दिए ।
सीटीईभीटीले यही माघ १५ गते बायो मेडिकल तर्फको प्रवेश परीक्षा र २२ गते प्रि डिप्लोमा तहको मौका परीक्षा लिने तयारी गरेको थियो ।
परिषद्ले आउँदो २७ गतेदेखि वार्षिक प्रणाली र सेमेस्टर प्रणालीतर्फका इन्जिनियरिङ, स्वास्थ्य, कृषिलगायतका विभिन्न कार्यक्रमअन्तर्गतका नियमित तथा पूरक परीक्षा सञ्चालन गर्ने तयारी गरेको थियो ।
परिस्थिति सहज हुनासाथ एक हप्ता अथवा दश दिनको समय दिएर नयाँ परीक्षा तालिका सार्वजनिक गर्ने सिटिइभिटीको तयारी रहेको उपनियन्त्रक घिमिरेले बताए ।
