प्रदेश १ सरकारले प्रदेशभित्रका मुख्य राजमार्गमा सिसी क्यामेरा जडान गर्ने भएको छ ।
कोसीको पुलदेखि मेचीपुलसम्म र विराटनगर जोगबनीदेखि धरानसम्म सिसी क्यामेरा जडान गर्न लागिएको प्रदेश १ सरकारका आन्तरिक मामिला तथा कानुन मन्त्री केदार कार्कीले जानकारी दिए ।
उनका अनुसार प्रदेशको शान्ति सुरक्षालाई ख्याल गर्दै सो स्थानका मुख्य राजमार्ग क्षेत्रमा सिसी क्यामेरा जडान गर्न लागिएको हो ।
मन्त्री कार्कीले शान्ति सुरक्षामा प्रविधिबाट निगरानी गरिने बताउँदै सिसी क्यामेरा जडान गर्नका लागि बजेट विनियोजन गरिएको जानकारी दिए ।
‘शान्ति सुरक्षाको दृष्टिकोणमा सरकार नागरिकसँगै छ’ भन्ने बनाउनका लागि सरकारले वैज्ञानिक ढङ्गले काम गरिरहेको उनको भनाइ छ ।
उनले भने, ‘हामीले वैज्ञानिक ढङ्गले काम गरिरहेका छौँ । प्रदेशको राजधानीलाई पनि हामीले प्रविधिमैत्री निगरानीमा राख्नेगरी काम गरिरहेका छौँ ।’
