दक्षिण अफ्रिकास्थित एउटा चिडियाखानामा सिंह र प्युमा (बिरालो परिवारको एक प्रजाति)मा कोरोना भाइरसको सङ्क्रमण सरेको छ ।
जर्नल भाइरसेसमा प्रकाशित अध्ययन अनुसार प्रीटोरिया विश्वविद्यालयका वैज्ञानिकहरूले चिडियाखानामा जनावरको रेखदेख गर्ने कर्मचारीबाट कोभिड सरेको हुनसक्ने बताएका छन् ।
ती जनावरहरूमा मानिसमा कोभिड हुने बेलामा देखा पर्ने लक्षण देखिएको थियो । श्वास फेर्न गाह्रो भएको, नाकबाट सिँगान बगेको र सुक्खा खोकी लागेको पाइएपछि उनिहरूको कोभिड १९ परीक्षण गरिएको थियो ।
जनावरमा गरिएका परीक्षणबाट सङ्क्रमण पुष्टि भएको र उनीहरूलाई रेखदेख गर्ने मानिसबाट भाइरस सरेको हुनसक्ने वैज्ञानिकहरूले बताएका हुन् ।
यदि भाइरस जनावरमा फैलिरह्यो अनि मानिसमा सर्यो भने नयाँ भेरिएन्टकाे उत्पत्ति हुन सक्ने जोखिम रहेको बताउँदै वैज्ञानिकहरूले जनावरको रेखदेख गर्दा मास्क लगाउन र अन्य सुरक्षाका उपाय अपनाउन सुझाएका छन् ।
