मानवीय सहायता सामग्रीसहित नेपाली टोली अफगानिस्तानको राजधानी काबुल प्रस्थान गरेको छ ।
तालिबानले सत्ता कब्जा गरेसँगै सङ्कटबाट गुज्रिरहेको अफगानिस्तानलाई औषधि, भाँडाकुँडा, लत्ताकपडा लगायतका सामग्री लिएर परराष्ट्र मन्त्रालयको टोली अफगानिस्तानका लागि उडेको हो ।
नेपाली टोलीको नेतृत्व मन्त्रालयकी सहसचिव एवम् सहप्रवक्ता सेवा लम्सालले गर्ने भएकी छिन् । लम्साल नेतृत्वको टोलीले काबुल विमानस्थलमा पुगी संयुक्त राष्ट्रसंघका प्रतिनिधिलाई सहयोग सामग्री हस्तान्तरण गरी आजै फर्किने कार्यक्रम रहेको छ ।
परराष्ट्र मन्त्री डा. नारायण खड्काका् अनुसार राष्ट्रसंघले उपलब्ध गराएको सूची अनुसार नै सहायता सामग्री सहयोग गर्न लागिएको हो ।
हिमालयन एयरलाइन्सबाट अफगानिस्तान प्रस्थान गरेको नेपाली टोलीका लागि सोही एयरलाइन्सले निःशुल्क हवाइजहाज उपलब्ध गराएको जानकारी मन्त्री खड्काले दिएका छन् । त्यसबाहेक नेपालले सहयोग गर्न लागेको सहायता सामग्री समेत व्यवसायीहरुले सरकारलाई कुनै दायित्व नपर्ने गरी निःशुल्क उपलब्ध गराएका हुन् ।
मन्त्री खड्काले विमानस्थलमा आयोजित पत्रकार सम्मेलनमा जानकारी दिए अनुसार खाद्यान्नबाहेक १४ टन मानवीय सहायता सामग्री अफगानिस्तानलाई हस्तान्तरण गर्न लागिएको हो ।
