काठमाडौँ मेडिकल कलेज र नोबेल मेडिकल कलेजका सञ्चालक सुनील शर्मालाई विद्यार्थीले सिंहदरबारभित्रै मोसो दले ।
शुक्रबार शिक्षा मन्त्रालयमा बसेको सर्वपक्षीय बैठकबाट बाहिरिनेक्रममा विद्यार्थीले मोसो दलेका हुन् ।
नेकपा (एस) निकट अनेरास्ववियुका उप महासचिव महेश श्रेष्ठ र स्थायी कमिटी सदस्य अमर पुनको नेतृत्वमा रहेको पाँच जनाको विद्यार्थीको समहूले मन्त्रालय परिसरमै उनीमाथि मोसो दलेका हुन् ।
शर्मा शिक्षा, विज्ञान तथा प्रविधिमन्त्री देवेन्द्र पौडेलको उपस्थितिमा भएको बैठकमा सहभागी भएर बाहिरिएको थियो ।
मन्त्रालयमा चिकित्सा शिक्षा आयोगले तोकेभन्दा बढी शुल्क लिन नपाउने विषयमा छलफल भएको थियो ।
पाँच जनाको समूहमा शिक्षा मन्त्रालयको गेटमा पुगेका उनीहरूले सुरुमा शर्मालाई ‘नमस्कार सर’ भनेका थिए ।
त्यसपछि उनीहरूलाई नमस्कारको प्रत्युत्तर पनि दिन नपाउँदै शर्मामाथि मोसो दलिएको थियो ।
मोसोले अनुहार पोतिएर शर्मा कालै भएका थिए ।
त्यसपछि उनी मन्त्रालयकै बाथरुममा मुख धोएर सिंहदरबारबाट बाहिरिएका छन् ।
उनीमाथि मोसो दल्ने पाँच जना विद्यार्थीलाई प्रहरीले तत्कालै पक्राउ गरेको छ ।
तर, सिंहदरबार उच्च सुरक्षा सतर्कता अपनाइएको क्षेत्रमा दलिएको मोसोले सुनील शर्मालाई मात्र दाग लगाएन हाम्रो प्रशासनिक र सुरक्षा संयन्त्रको अनुहारमा दाग लगायो ।
सिंहदरबार परिसरभित्रै मोसो दलेपछि हाम्रो सुरक्षा संयन्त्रमाथि प्रश्नचिन्ह उठेको छ ।
सिंहदरबारलाई उच्च सुरक्षा सतर्कता अपनाइएको क्षेत्रमा लिइन्छ ।
गृह मन्त्रालयले २ दिन अगाडि (पुस २८) मा एक सूचना जारी गर्दै सिंहदरबार परिसर प्रवेश गर्न यसअगाडि जारी गरिएका सबै स्थायी/अस्थायी पास बन्द गरेको जनाएको थियो ।
पास बन्द भएको अवस्थामा पनि सिंहदरबार भित्र पुगेका विद्यार्थीहरूले कडा सुरक्षाबीच पनि मोसो दल्न सफल भएपछि सुरक्षा संयन्त्रको अनुहारमा दाग लागेको विश्लेषण गर्न थालिएको छ ।
