अफ्रिका कप अफ नेसन्सअन्तर्गत आज भएको खेलमा मोरक्को र गिनीले आ–आफ्नो खेलमा जित दर्ता गराएका छन् ।
मोरक्कोले घानाविरुद्ध १–० को जित निकाल्दा गिनीले मलावीलाई १–० गोलान्तरले पाखा लगाउँदै स्पष्ट तीन अङ्क बटुल्न सफल भएको हो ।
क्यामरुनस्थित अहमदौ अहिजो रङ्गशालामा भएको खेलमा मोरक्कोलाई जिताउन एकमात्र गोल खेलको ८३औं मिनेटमा सोफियानी बौफालले गरे ।
यता खवेकङ्ग रङ्गशालामा भएको आजको चौथो खेलमा गिनीलाई जित दिलाउन इसियागा सिलाले खेलको पहिलो हाफमा गरेको गोल निर्णायक बन्यो ।
सिलाले खेलकाे ३५औं मिनेटमा गाेल गरेका थिए ।
पहिलो हाफमा गिनीले अग्रता लिएपनि त्यसपछि खेलको बाँकी समयमा गोल हुन नसकेपछि खेल गिनीले आफ्नो पक्षमा पार्न सफल भयो ।
आजको खेलमा जित निकालेसँगै गिनी समूह ‘बी’ को शीर्ष स्थानमा रहेको छ । त्यस्तै, घानालाई पराजित गर्दै स्पष्ट तीन अङ्क बटुलेको मोरक्को पनि समूह ‘सी’ को शीर्ष स्थानमा रहन सफल भएको छ ।
अफ्रिका कप अफ नेसन्सअन्तर्गत भोलि तीन खेल हुँदैछन् । कोमोरसले गाबोनको सामना गर्दा, अल्जेरीया र सियेरालियोने र नाइजेरीया र इजिप्ट आमनेसामने हुँदैछन् ।