बच्चा जन्माएर बेवारिसे अवस्थामा छाडेको आरोपमा म्याडग्यास्करकी २० वर्षीया युवतीलाई पक्राउ गरिएको छ ।
जनवरी १ मा म्याडाग्यास्करबाट सर सीवुसागुर रामगुलाम अन्तर्राष्ट्रिय विमानस्थलमा आएको एयर मोरिसस विमानको शौचालयको फोहोर फाल्ने भाँडामा एउटा नवजात शिशु फेला परेको थियाे ।
विमानको नियमित जाँच गर्दा त्यहाँ भर्खर जन्मिएको जीवित शिशु विमानस्थलका अधिकारीहरूले फेला पारेका थिए । शिशुलाई तत्काल उपचारका लागि सार्वजनिक अस्पताल पुर्याइएको थियो ।
बच्चाकी आमा भएको आशङ्कामा पक्राउ परेकी युवतीले सुरुमा बच्चा आफ्नो नभएको दाबी गरेकी थिइन् ।
चिकित्सकीय परीक्षणमा उनले भर्खरै बच्चा जन्माएको पुष्टि भएसँगै ती महिलालाई प्रहरीको निगरानीमा अस्पतालमा राखिएको छ । अस्पतालबाट निस्किएपछि ती युवतीसँग थप सोधपुछ गरिनेछ ।
