प्रधानमन्त्री शेरबहादुर देउवा एक दिने भ्रमणमा मङ्गलबार (आज) धरान आउने भएका छन् । दोस्रो पटक नेपाली काङ्ग्रेसकाे सभापतिमा निर्वाचित भएयता यो उनको पहिलो औपचारिक कार्यक्रम हो ।
धरान विधिवत् नगरपालिका घोषणा भएको ६१औँ वर्ष पूरा भएको अवसरमा पुस २० देखि २२ सम्म धरान स्थापना दिवस ‘धरान डे’ को उद्घाटन गर्न उनी धरान आउन लागेका हुन् । उनले धरानमा आधा दर्जनजति कार्यक्रममा सहभागिता जनाएर आजै काठमाडाैँ फर्किने छन् ।
उनी १० बजे धरान आइपुग्ने धरान उपमहानगर प्रमुख तिलक राईको सचिवालयले जनाएको छ । देउवाले धरान २ स्थित रहेको नेपाली काङ्ग्रेस सुनसरी क्षेत्र नं. १ को नवनिर्मित पार्टी कार्यालय भवनको उद्घाटन गर्ने पहिलो कार्यक्रम तय भएको छ ।
त्यसपछि धरान ६ पानवारीमा रहेको फोहोर प्रशोधन केन्द्रको उद्घाटन गर्ने कार्यक्रम रहेको छ भने धरान ८ स्थित तीनकुने सुन्दर बस्ती विकास आयोजनामा बन्दै गरेको बसपार्कको अवलोकन गर्ने बताइएको छ ।
बसपार्क अवलोकनपश्चात् प्रधानमन्त्री देउवाले धरान १२ स्थित निर्माण भएको प्राविधिक शिक्षालय भवनको उद्घाटन गर्ने कार्यक्रम छ भने दिउँसो १ बजे धरान स्थापना दिवसको औपचारिक कार्यक्रम धरान १२ स्थित पब्लिक हाइ स्कुलको प्राङ्गणमा उद्घाटन गर्ने कार्यक्रम तय भएको छ ।
त्यही बाटोमा धरानको निर्माणाधीन बसपार्क रहेकाले त्यसको उपलब्धि जानकारी लिनको लागि समय मिलाइएको हो । बसपार्क अवलोकनपछि प्रमुख राईको निवासमा खानाको प्रबन्ध मिलाइएको छ ।
खानाकै समयमा सुनसरी काङ्ग्रेसका नेताहरूसँग भेटघाटको व्यवस्था मिलाइएको छ । खानापछि धरान महोत्सवमा सहभागी भएर प्रधानमन्त्री देउवा दिउँसो ४ बजे काठमाडौँ फर्कने कार्यक्रम रहेको छ ।
यसैगरी, धरान स्थापना दिवसको अवसरमा उपमहानगरपालिकाले भोलि सार्वजनिक बिदा दिएको छ । धरान डेको अवसरमा सार्वजनिक बिदा दिने निर्णय भएको मेयरको सचिवालयले जनाएको छ ।
