भारतमा ओमिक्रोन सङ्क्रमितको सङ्ख्या एक हजार दुई सय ७० पुगेको छ ।
भारतको स्वास्थ्य मन्त्रालयको तथयाङ्कअनुसार एकैदिन तीन सय नौ जनामा ओमिक्रोन पुष्टि भएसँगै ओमिक्रोन सङ्क्रमितको सङ्ख्या एक हजार दुई सय ७० पुगेको हो ।
भारतमा ओमिक्रोनको सङ्क्रमण पनि तीव्र रूपले बढिरहेको छ । त्यसमा पनि महाराष्ट्र र दिल्लीमा सङ्क्रमितको सङ्ख्या दिनप्रतिदिन बढ्दै गएको छ ।
त्यस्तै पछिल्लो २४ घण्टामा भारतमा १६ हजार सात सय ६४ जनामा कोरोना भाइरसको सङ्क्रमण पुष्टि भएको छ । यो सँगै देशमा कोरोना सङ्क्रमितको कुल सङ्ख्या तीन करोड ४८ लाख नाघेको छ ।
एक दिनमा सात हजार पाँच सय ८५ जना कोरोना सङ्क्रमणबाट निको भएसँगै देशमा सक्रिय सङ्क्रमितको सङ्ख्या ९१ हजार तीन सय ६१ रहेको छ । हालसम्म कोरोना सङ्क्रमणबाट कुल चार लाख ८१ हजार ८० जनाको मृत्यु भएको छ ।
