गुलियो पेय पदार्थको कारण समय अगावै मृत्यु हुने सम्भावना बढ्ने अनुसन्धानले देखाएकाे छ ।
धेरै गुलियो पेयपदार्थको सेवनले असामयिक निधन हुने खतरा बढाउने हार्भर्ड विश्ववद्यालयको टीएच चान स्कूल अफ पब्लिक हेल्थको अनुसन्धानमा देखिएको छ ।
प्रमुख अनुसन्धानकर्ता वसन्ती मलिकका अनुसार महिनामा एक पटकभन्दा कम गुलियो पेय पदार्थ पिउने मानिसको तुलनामा महिनामा एकदेखि चार पटक गुलियो पेय पिउनेहरूमा खतरा एक प्रतिशतले बढ्ने हुन्छ ।
त्यस्तै, हप्ताको दुईदेखि ६ पटक गुलियो पेय पिउने मानिसमा खतरा ६ प्रतिशतले, दिनमा एक वा दुई पटक पिउनेमा १४ प्रतिशत र दैनिक दुईभन्दा बढी पटक पिउने मानिसमा समय अगावै मृत्यु हुने जोखिम २१ प्रतिशतले बढ्ने उनको भनाइ छ । गुलियो पेयपदार्थको असर मोटोपनभन्दा घातक हुनसक्ने हार्भर्डको अध्ययनले देखाएको छ ।
गुलियो पेयपदार्थको सेवनले बालबालिका र किशोरकिशोरीमा समेत नाकारात्मक असर पार्न सक्छ । अध्ययनले गुलियो पेय पदार्थको सेवन र मुटुसम्बन्धी समस्याबाट हुने मृत्युबीचको सम्बन्धका साथै क्यान्सरबाट मृत्यु हुने सम्भावना रहेको देखाएको छ ।
अध्ययनका लागि ३० वर्ष उमेरभन्दा माथिका ३७ हजार पुरुष र ८० हजार महिलाबाट तथ्याङ्क सङ्कलन गरिएको थियो ।
