दुहबी। धान उत्पादनमा आत्मनिर्भर बनाउने उद्देश्यसहित दुहबी नगरपालिकाले २० बिघा क्षेत्रफलमा चैतेधान प्रवर्द्धन कार्यक्रम सञ्चालन गरेको छ। उक्त कार्यक्रमअन्तर्गत सोमबार नगरप्रमुख बेद गच्छादारले ८ लाख रुपैयाँ बराबरका कृषि सामग्री, मल र विषादी वितरण गरेका छन्।कार्यक्रममा कृषि शाखा प्रमुख अजय गौतम, कृषि फार्मका अध्यक्ष हिरालाल माझी लगायत कृषक समूहको उपस्थिति रहेको थियो।
दुहबी नगरपालिकाका वडा नम्बर १ र ७ का ३५ जना कृषकलाई कृष्ण कृषि फार्म प्रास्टोकीमा आयोजित कार्यक्रममा ५० प्रतिशत अनुदानमा सामग्री हस्तान्तरण गरिएको हो। वितरण गरिएका सामग्रीमा मिनी टिलर ६ थान, मोटरसेट ४ थान, त्रिपाल २५ थान, स्प्रे २५ थान, समरसेट २५ थान, कोदालो २५ थान, धानको बीउ ६ सय केजी, जिन ६ सय केजी, भर्मिकम्पोस्ट ३ सय बोरा तथा विषादी लगायतका सामग्री रहेका छन्।
कृषि सामग्री हस्तान्तरणपछि बोल्दै नगरप्रमुख गच्छादारले नेपालमा आवश्यक करिब ६० हजार टन धानमध्ये ५७ हजार टन मात्रै उत्पादन हुने अवस्थालाई मध्यनजर गर्दै चैतेधान प्रवर्द्धन कार्यक्रम ल्याइएको बताए। उनले कृषकलाई समेट्दै चैतेधान खेतीप्रति आकर्षण बढाउने प्रयास भइरहेको उल्लेख गरे।
कृषिमा आधारित जनसंख्या धेरै रहेको दुहबी नगरपालिकालाई कृषि क्षेत्रकै माध्यमबाट रोजगारी सिर्जना गर्दै आत्मनिर्भर बनाउने लक्ष्यसहित यस्ता कार्यक्रम सञ्चालन गरिएको र आगामी दिनमा पनि कृषकको आवश्यकता अनुसार सहयोग गरिने उनले प्रतिबद्धता जनाए।
नगरपालिकाले कृषि विकास शाखामार्फत सिँचाइ उपकरण तथा बीउबिजन अनुदानमा उपलब्ध गराउँदै आएको छ। हिउँदमा बाँझो रहने जमिनमा सिँचाइ व्यवस्था गरी धान खेती विस्तार गर्न किसानलाई प्रोत्साहन गरिएको हो।
कृषि शाखा प्रमुख गौतमका अनुसार बाली विकास तथा जैविक विविधता केन्द्रको कार्यक्रमअन्तर्गत चैतेधान खेतीको क्षेत्र विस्तार गरी उत्पादन बढाउने लक्ष्यसहित यो कार्यक्रम सञ्चालन गरिएको हो।
