विराटनगर। कोशी प्रदेश सरकारको निर्णयअनुसार उद्योग, कृषि तथा सहकारी मन्त्रालयमा हप्ताको दुई दिन बुधबार र शुक्रबार स्थानीय उत्पादनबाट बनेका ढाका, अल्लो लगायतका पोसाक सरकारी पोसाकका रूपमा अनिवार्य प्रयोग गर्न थालिएको छ।
उद्योग, कृषि तथा सहकारी मन्त्री डा. इस्राईल मन्सुरीको नेतृत्वमा मन्त्रालयले प्रदेश सरकारको निर्णय कार्यान्वयनमा ल्याएको हो। स्थानीय उत्पादनको प्रवर्द्धन, स्वदेशी उद्योगको संरक्षण तथा घरेलु उत्पादनको बजारीकरणलाई टेवा पुर्याउने उद्देश्यले यो व्यवस्था लागू गरिएको मन्त्रालयले जनाएको छ।
मन्त्रालयका कर्मचारीहरू बुधबार र शुक्रबार ढाका, अल्लो तथा अन्य स्थानीय उत्पादनबाट बनेका पोसाकमा कार्यालय उपस्थित हुन थालेका छन्। प्रदेश सरकारले सरकारी निकायबाटै स्वदेशी उत्पादनको प्रयोग बढाएर स्थानीय उद्योग, बुनकर र हस्तकला व्यवसायीलाई प्रोत्साहन गर्ने नीति लिएको जनाएको छ।
