काठमाडौं । एसीसी महिला प्रिमियर कप अन्तर्गत मलेसियामा जारी प्रतियोगिताको पहिलो खेलमा कतारले नेपाललाई ७७ रनको लक्ष्य दिएको छ।
टस हारेर पहिले ब्याटिङको निम्तो पाएको कतार १६.५ ओभरमा सबै विकेट गुमाउँदै ७६ रनमा समेटियो।
कतारका लागि ओपनर गेटरुडे चन्दिरुले सर्वाधिक २५ रन बनाइन्। कप्तान आइशाले १० रनको योगदान दिइन्।
नेपालका लागि रुबिना क्षेत्रीले उत्कृष्ट बलिङ गर्दै ३ विकेट लिइन्। त्यस्तै कविता कुँवर, पूजा महतो र रिया शर्माले समान १–१ विकेट हात पारे।
कतारका चार ब्याटर रनआउट भएका थिए, जसका कारण टोली ठूलो स्कोर बनाउन असफल रह्यो।
अब नेपालले प्रतियोगितामा विजयी सुरुआत गर्न ७७ रनको लक्ष्य पछ्याउनेछ।
