सल्यान — सल्यानको कपुरकोट गाउँपालिका–३ चोरखोलमा जिप दुर्घटना हुँदा चालकको मृत्यु भएको छ भने तीन जना घाइते भएका छन्।
रुकुमपूर्वको सिस्ने गाउँपालिकाबाट दाङतर्फ जाँदै गरेको ग १ ज ३५६१ नम्बरको पिकअप जिप बुधबार बिहान करिब पौने पाँच बजेतिर दुर्घटनामा परेको प्रहरीले जनाएको छ।
दुर्घटनामा रुकुमपूर्व सिस्ने गाउँपालिका–४ अमलाचौरका ३१ वर्षीय विजय विश्वकर्माको घटनास्थलमै मृत्यु भएको हो। मृतक विश्वकर्मा जिप चालक रहेको प्रहरी चौकी कपुरकोटले जनाएको छ।
बिरामी बोकेर हिँडेको उक्त जिपमा चालकसहित चार जना सवार थिए। दुर्घटनामा दुई महिला र एक बच्चा घाइते भएका छन्। घाइते हुनेमा सिस्ने गाउँपालिका–२ नाइघाटकी २२ वर्षीया सुष्मी रोका, ४० वर्षीया ललिता केसी र १८ महिनाकी बालिका सफलता केसी रहेका छन्।
घाइते तीनै जनाको उद्धार गरी कपुरकोट गाउँपालिकाको आधारभूत अस्पतालमा प्राथमिक उपचार गरिएको र थप उपचारका लागि दाङको तुलसीपुर पठाइएको प्रहरीले जनाएको छ।
