दिग्गज कलाकार सुनिल थापाको हृदयाघातका कारण आज बिहान निधन भएको छ। थापाथलीस्थित नर्भिक इन्टरनेशनल हस्पिटलमा उपचारका क्रममा उनको निधन भएको कलाकार संघका अध्यक्ष मोहन निरौलाले जानकारी दिएका छन्।
‘थापाथलीस्थित नर्भिक इन्टरनेशनल हस्पिटलमा उहाँको निधन भएको हो,’ अध्यक्ष निरौलाले भने, ‘परिवारका सदस्यहरू मुम्बईबाट आएपछि थप प्रक्रिया अगाडि बढाइनेछ।’
स्वास्थ्यमा समस्या देखिएपछि थापालाई अस्पताल लगिएको थियो। उनी लामो समयदेखि नेपाली तथा भारतीय चलचित्र उद्योगमा सक्रिय थिए। नेपाली चलचित्रमा खलनायकको भूमिकालाई पनि नायकसरह प्रतिष्ठा र सम्मान दिलाउन सफल कलाकारका रूपमा उनी परिचित थिए।
उनका परिवारका अधिकांश सदस्यहरू भारतको मुम्बईमा बसोबास गर्दै आएका छन्। परिवारका सदस्यहरू आएपछि अन्त्येष्टि लगायतका थप प्रक्रिया अघि बढाइने अध्यक्ष निरौलाले बताए।
