धनकुटा, माघ १२ — आगामी फागुन २१ गते हुने प्रतिनिधिसभा निर्वाचनका लागि आवश्यक संख्यामा निर्वाचन प्रहरीको आवेदन नपुगेपछि दोस्रो पटक म्याद थप गरिएकोमा ४९३ जनाले दरखास्त दिएका छन्।
धनकुटामा निर्वाचन सुरक्षाका लागि कुल १ हजार ८५ जना निर्वाचन प्रहरी आवश्यक रहेकामा पहिलो चरणमा कोटा अनुसार आवेदन नपरेपछि म्याद थप गरिएको थियो। पुस २५ गतेदेखि माघ १ गतेसम्म खुला गरिएको दरखास्तमा पर्याप्त आवेदन नपरेपछि पहिलो पटक माघ ३ गतेसम्म म्याद थपिएको थियो। उक्त अवधिमा १ हजार १८ जनाको मात्र आवेदन परेको थियो।
निवेदन परेका सबैलाई छनौट गर्दा पनि ६७ जना अपुग रहेको र आवेदन दिएका कतिपय व्यक्ति सम्पर्कमा नआउँदा करिब १ सयभन्दा बढीको कमी भएको जिल्ला प्रहरी कार्यालय धनकुटाका प्रहरी इन्सपेक्टर किशोर तामाङले जानकारी दिए।
माग अनुसार आवेदन नपुगेपछि पुनः माघ १० र ११ गते दोस्रो पटक म्याद थप गरी सूचना जारी गरिएको थियो। सो अवधिमा ४९३ जनाले निर्वाचन प्रहरीका लागि आवेदन दिएको तामाङले बताए।
दोस्रो पटक म्याद थपिएपछि मागभन्दा बढी आवेदन परेकाले सोमबारदेखि छनौट प्रक्रिया सुरु गरिएको जिल्ला प्रहरी कार्यालयले जनाएको छ। निर्वाचन प्रहरीका लागि जिल्ला प्रहरी कार्यालय धनकुटा, सशस्त्र प्रहरी बल नं. ६ गुल्म हे.क्वा. छिन्ताङ, इलाका प्रहरी कार्यालय छिन्ताङ तथा इलाका प्रहरी कार्यालय राजारानीबाट आवेदन संकलन गरिएको थियो।
