काठमाडौं – अन्तर्राष्ट्रिय क्रिकेट परिषद् (आईसीसी) ले बंगलादेशलाई टी–२० विश्वकप २०२६ बाट हटाउने कडा निर्णय गरेको छ। भारतमा आयोजना हुने विश्वकपमा खेल्न अस्वीकार गरेपछि आईसीसीले बंगलादेशलाई प्रतियोगिताबाट बाहिर राखेको हो।
बंगलादेश क्रिकेट बोर्ड (बीसीबी) ले भारतमा सुरक्षा चुनौती रहेको दाबी गर्दै आफ्ना खेलहरू भारतबाहिर, विशेषगरी श्रीलंकामा आयोजना गर्न माग गरेको थियो। तर आईसीसीले भारतमा आवश्यक सुरक्षा व्यवस्था पर्याप्त रहेको निष्कर्ष निकाल्दै उक्त माग अस्वीकार गर्यो। त्यसपछि पनि बंगलादेशले भारतमै खेल्न नजाने अडान नछाडेपछि आईसीसीले प्रतियोगिताबाट हटाउने निर्णय लिएको हो।
आईसीसी स्रोतका अनुसार, बहुराष्ट्रिय प्रतियोगितामा आयोजक राष्ट्रको निर्णय अस्वीकार गर्नु नियम र खेलभावनाविपरीत हुने भएकाले यस्तो कदम चालिएको हो। यस विषयमा आईसीसीले बंगलादेशलाई पटक–पटक स्पष्टिकरण र सहमतिका लागि समय दिएको भए पनि अन्तिमसम्म समाधान निस्कन सकेन।
बंगलादेशको स्थानमा स्कटल्यान्डले टी–२० विश्वकप २०२६ मा सहभागी हुने अवसर पाएको छ। छनोट प्रक्रियामा सहभागी टोलीहरूमध्ये दोस्रो उच्च वरियतामा रहेको स्कटल्यान्डका लागि यो निर्णय ऐतिहासिक अवसरका रूपमा हेरिएको छ। लामो समयदेखि विश्वकपमा स्थायी स्थान बनाउन संघर्ष गर्दै आएको स्कटल्यान्ड क्रिकेटका लागि यो सहभागिता ठूलो उपलब्धि मानिएको छ।
