काठमाडौं, १० माघ – आईसीसी महिला टी–२० विश्वकप ग्लोबल छनोटको आफ्नो तेस्रो खेलमा नेपालले आज जिम्बाबेसँग खेल्दैछ। खेल त्रिवि क्रिकेट मैदानमा दिउँसो १ बजे सुरु हुनेछ।
नेपालले यसअघिका दुई खेलमा पराजित भइसकेको छ। पहिलो खेलमा थाइल्यान्डसँग ६ विकेटले पराजित भएको थियो भने दोस्रो खेलमा नेदरल्यान्ड्ससँग २ रनले हार बेहोरेको थियो।
नेपालले अघिल्लो चरणमा पुग्न बाकी दुई खेल जित्नुपर्ने आवश्यकता छ। समूह ‘बी’ बाट नेदरल्यान्ड्स सुपर सिक्समा पुगिसकेको छ भने थाइल्यान्डको सम्भावना पनि बलियो देखिएको छ। शनिबार विहान हुने थाइल्यान्ड–स्कटल्यान्ड खेलपछि समिकरण अझ स्पष्ट हुने अपेक्षा गरिएको छ।
जिम्बाबे महिला टी–२०आई र्याङ्किङमा १५औं स्थानमा छ भने नेपाली टोली २१औं स्थानमा रहेको छ। जिम्बाबेले नेपाल जस्तै अहिलेसम्म महिला टी–२० विश्वकप खेलेको छैन। जिम्बाबेले अफ्रिका छनोट पार गरेर ग्लोबल छनोटमा स्थान बनाएको हो।
