विराटनगर । पूर्वराष्ट्रपति विद्यादेवी भण्डारी सोमबार विराटनगर पुगेकी छन्। विराटनगरस्थित उद्घोष दैनिकको वार्षिकोत्सवमा सहभागी हुन उनी सोमबार विराटनगर पुगेकी हुन् ।
उनले स्वागपछि विराटनगर विमानस्थलमा आफू नेकपा(एमाले) को संगठित सदस्य र कार्यकर्ता नै रहेको बताइन् ।
भण्डारीले नेकपा (एमाले) को नीति र कार्यक्रम अनुसार नै अघि बढ्ने दाबीसमेत गरिन् ।
आफ्नो ४५ वर्ष लामो एमालेसँगको आबद्धता स्मरण गराउँदै भण्डारीले पार्टीको हितका लागि काम गर्ने प्रतिबद्धता व्यक्त गदै आफू एमाले नै भएको बताइन् । उनले एमाले नै भएर राष्ट्रपतिमा निर्वाचित भएकोले अहिले पनि त्यसकै कार्यकर्ता रहेको दाबी गरिन्।
राजतन्त्र र गणतन्त्र फरक रहेको भन्दै उनले पद सकिएपछि पुरानो काममा फर्कन सकिने जिकिर गरिन् । राष्ट्रपतिको पद आवधिक हुने र कार्यकाल सकिएपछि जुनसुकै नागरिक पनि आफ्नो सामाजिक वा राजनीतिक जीवनमा फर्किन सक्ने उनको भनाइ थियो ।
‘राजतन्त्र र गणतन्त्र फरक हो । यो आवधिक हुन्छ। जोसुकै पनि जनताको सहभागिताले निर्वाचित भएर आउन सक्छ । कार्यकाल सकिएपछि आफ्नो पुरानै जीवनमा फर्कन सकिन्छु, उनले भनिन् ।
सदस्यता नवीकरण नगर्ने केन्द्रीय कमिटीको निर्णयबारे सोधिएको प्रश्नमा भण्डारीले आफूलाई औपचारिक जानकारी नभएको जानकारी दिँदै पार्टीको औपचारिक कुरा के छ आफूलाई त्यो थाहा नभएको प्रस्ट पारिन् ।
‘सबै सदस्यहरूलाई सबै कुरा थाहा हुँदैन। कमिटीमा बस्नेहरूलाई थाहा होला,’ उनले भनिन् । उनले आफू अहिले केन्द्रीय समितिमा नरहेको कारण पार्टीको औपचारिक निर्णयबारे जानकारी नभएको स्पष्ट पारिन् ।
भण्डारीले गत साउन १४ गते एमालेको सक्रिय राजनीतिमा आउने घोषणा गरेकी थिइन् । उले केपी ओलीबाट एमालेको नेतृत्व हुन नसक्ने भन्दै अब अध्यक्षको दाबेदारी गर्नेसमेत बताएकी थिइन् । त्यस लगत्तै बसेको एमालेको केन्द्रीय समिति बैठकले उनको नवीकरण भइसकेको पार्टी सदस्यता नै खारेज गरेको थियो ।
उनी सक्रिय राजनीतिमा आउन रोक लगाउने निर्णय एमालेले गरेको भए पनि भण्डारीले आफ्नो अभियान नरोकिने बताउँदै आएकी छन् ।
भण्डारीले आफ्नो सदस्यता पार्टीको विधान र प्रक्रिया अनुसार नवीकरण भइसकेको जिकिरसमेत गरिन् ।
राष्ट्रपतिमा निर्वाचित हुँदा पनि पार्टीले विशेष निर्णय गरेर पठाएको र कार्यकाल सकिएपछि आफूले विधिवत् रूपमा सदस्यता नवीकरण गरेको उनको भनाइ छ ।
आफू आलोचनाभन्दा मुक्त नरहेको उनले बताइन् । गुट चलाएको आरोपको प्रतिवाद गर्दै भण्डारीले भनिन् ।
