सुक्रिया मियाँले अतिरिक्त समयमा गरेको एक मात्रै गोलबाट नेपालले एएफसी महिला यू–२० एसियन कप छनोट खेलमा साउदी अरबलाई हराएको छ ।
भुटानको थिम्पुस्थित चामलिमिथाङ रंगशालामा शुक्रबार भएको समूह ‘ए’ को दोस्रो खेलमा नेपालले कमजोर टोली साउदीविरुद्ध कठिन जित निकालेको हो । यससँगै नेपालले तीन अंक जोडेर समूहको दोस्रो स्थानमा पुगेको छ ।
दोस्रो हाफको अतिरिक्त समय सुक्रिया मियाँले गरेको गोल निर्णायक भयो । त्यसअघि खेलको ३७औँ मिनेटमा नेपालले अग्रता लिने अवसर पाएको थियो । तर नेपाली स्ट्राइकर मीना देउवाले चिप्लिन पुगेर फितलो प्रहार गर्दा गोलमा परिणत हुन सकेन ।
यसअघि पहिलो खेलमा नेपालले आयोजक टोली भुटानसँग १–१ गोलको बराबरी खेलेको थियो । उता समूहको शीर्ष स्थानको उत्तर कोरियाले साउदीलाई १५–० ले हराएको थियो । लगातार दोस्रो हारपछि साउदी अरब यो प्रतियोगिताबाट घर फर्किएको छ ।
सिंगल राउन्ड छनोट प्रतियोगिताको समूह विजेताले आगामी वर्ष थाइल्यान्डमा एसियन कप खेल्नेछ । समूह चरणपछिका शीर्ष तीन उपविजेता देशका लागि छनोटको एक मौका मिल्नेछ ।
साउदीविरुद्ध झिनो जितले नेपालमाथि दबाब बढेको छ । अब नेपालले उत्तरकोरियालाई फराकिलो अन्तरले हराउनुपर्ने चुनौती छ ।
