नेकपा माओवादी केन्द्रका अध्यक्ष पुष्पकमल दाहाल प्रचण्डले सरकार बनाउने भत्काउने खेलमा नभई संगठन बलियो बनाउने विषयमा केन्द्रित हुनुपर्नेमा जोड दिएका छन् । शुक्रबारदेखि सुरु भएको स्थायी कमिटी बैठकमा अध्यक्ष प्रचण्डले १० बुँदे ब्रिफिङ मार्फत संगठन निर्माणमा पार्टीलाई केन्द्रित बनाउनु पर्ने विषयमा जोड दिएको पार्टी सचिव देवेन्द्र पौडेलले जानकारी दिए । बैठकमा अध्यक्ष प्रचण्डले प्रस्तुत गरेका १० बुँदे ब्रिफिङ उदृत गर्दै पौडेलले भने, ‘पार्टीको आन्तरिक कुरा पार्टीभित्रै गरौं बाहिर नलैजाऊँ भन्ने उहाँको कुरा छ । सरकार बनाउने भत्काउने अहिले हाम्रो कुनै जमर्को छैन । यो विषयमा नलागौं ।’
पौडेलका अनुसार पार्टीको स्थगित अभियान वर्षा सकिएपछि सुरु गर्ने अध्यक्षको प्रस्ताव छ । पार्टीको अभियान सकिएपछि केन्द्रीय कमिटी बैठक बस्ने उनले बताए । उनले भने, ‘सो केन्द्रीय कमिटी बैठकले पार्टीको महाधिवेशनको मिति तय गर्छ । ’समाजवादी मोर्चालाई बलियो बनाउने गरी पार्टी लागि परेको भन्दै उनले मोर्चाबीच एकीकरणको प्रयास पनि भइरहेको उनले बताए । माओवादी पार्टीको स्थायी कमिटी बैठक तीन दिनसम्म चल्ने छ ।
