नेपालमै पहिलोपटक अन्तर्राष्ट्रियस्तरको ’नेपाल फिटनेस एक्स्पो, २०८२’ आयोजना हुने भएको छ ।
फिटनेसलाई शिक्षाको रूपमा प्रवद्र्धन गर्ने उद्देश्यले क्लासिक फिटनेस एकेडेमीले यो एक्स्पो आयोजना गर्न लागेको शुक्रबार पत्रकार सम्मेलन गरेर जानकारी दिएको हो । यसको व्यवस्थापन रिंगल इभेन्टले गर्नेछ ।
आगामी भदौ १४ गते होटेल मल्लमा हुने यस एक्स्पोमा ७० लाख रुपैयाँ भन्दा बढी खर्च हुने अनुमान गरिएको क्लासिक फिटनेस एकेडेमी नेपालका संस्थापक निर्देशक रोजल शाहीले जानकारी दिए ।
एक्स्पोमा भारत, मलेसिया लगायतका एसियाली मुलुकका प्रसिद्ध फिटनेस इन्फ्लुएन्सरहरू र व्यावसायिक प्रतिनिधिहरूको सहभागिता रहने आयोजकले जानकारी दिएको छ ।
एक्स्पो फिटनेससम्बन्धी सामग्री र सेवाहरूको प्रदर्शनी मात्र नभई व्यावसायिक सञ्जाल विस्तार गर्ने एक महत्त्वपूर्ण प्लेटफर्म भएको एकेडेमीका संस्थापक शाहीले बताए । एक्सपोको मुख्य उद्देश्य नेपाली फिटनेस उद्योगलाई व्यावसायिक रूपमा बलियो बनाउँदै अन्तर्राष्ट्रिय स्तरमा पुर्याउनु रहेको शाहीको भनाई छ ।
एक्स्पोमा ब्रान्ड प्रदर्शनी, पोषण, उपकरण, पोशाक, र स्वास्थ्यसम्बन्धी सेवाहरू उपलब्ध हुनेछन्। साथै, फिटनेस अवार्ड शो पनि आयोजना गरिनेछ, जसमा ’राइजिङ एथलेटिक’, ’बेस्ट एथलेटिक’, ’बेस्ट कोच’, र ’लाइफटाइम एचिभमेन्ट’ गरी चार विधामा सम्मान प्रदान गरिने सम्मेलनमा जानकारी दिएको छ ।
यस कार्यक्रममा राजेश शाही, महेश्वर महर्जन, प्रज्वलमान शाक्य, रजनी श्रेष्ठ जस्ता नेपाली फिटनेस आइकन र अन्य अन्तर्राष्ट्रिय सेलिब्रेटीहरू पनि सहभागी हुने आयोजकले जानकारी दिएको छ ।
एक्स्पो नयाँ जिम सेन्टर खोल्ने, ट्रेनर बन्ने, र सप्लिमेन्टको व्यापार गर्न चाहनेहरूका लागि नेटवर्किङ र व्यवसायका अवसरहरू सिर्जना गर्ने एक ठूलो मौका हुने आयोजकको भनाई छ ।
एक्स्पोमा निःशुल्क प्रवेश रहेको छ भने आउने सहभागीलाई हात खाली नहुने गिफ्ट पनि रहेको आयोजकको भनाई छ ।
