प्रधानमन्त्री केपी शर्मा ओलीले राष्ट्रिय स्वतन्त्र पार्टीका सभापति रवि लामिछानेलाई आफूले नै राजनीतिमा ल्याएको बताएका छन् ।
कैलालीको जानकी गाउँपालिका-९ कटासेस्थित रानी जमरा कुलरिया आयोजनाको सिचाईँतर्फको थप सिँचाइ, जलविद्युत र प्रसारण लाइनको मंगलबार उद्घाटनका क्रममा उनले यस्तो बताएका हुन् ।
ओलीले राष्ट्रिय लामिछानेलाई राजनीतिमा ल्याउने व्यक्ति आफू नै भएको दाबी गर्दै उपप्रधानमन्त्री र गृहमन्त्रीसमेत बनाएको स्मरण गराएका छन् । अहिले लामिछानेका समर्थकहरू आफूलाई गाली गरिरहेको भन्दै उनले गुनासो पोखेका छन् ।
प्रधानमन्त्री ओलीले जनतालाई व्यवस्थाविरोधी शक्तिहरूको भ्रममा नपर्न पनि आग्रह गरेका छन्। ‘जो संसदविरोधी छन्, उनीहरू अहिलेको व्यवस्थामाथि प्रहार गरिरहेका छन्। हामीले लोकतन्त्र ल्याउँदा थुप्रै यातना सह्यौं, जेलनेल भोग्यौं। तर अहिले उनीहरू तर मार्न आएका छन्।’
उनले सामाजिक सञ्जालमा गालीगलौजसहित दिइने गैरजिम्मेवार अभिव्यक्तिको पनि आलोचना गरे । ‘फेसबुकमा स्टाटस लेख्न, अरुलाई गाली गर्न र सभ्यतामाथि आक्रमण गर्न पाउनु स्वतन्त्रता होइन’, उनले भने ।
सहकारी ठगी प्रकरणमा रविविरुद्ध अदालतले गरेको आदेशलाई लिएर रास्वपाले गरिरहेको हस्ताक्षर अभियानप्रति ओलीले आपत्ति जनाए ।
‘कसैले अपराध गरेमा थुन्ने कि नथुन्ने भन्ने कुरा अदालतको हो, सरकारको होइन’, उनले भने, ‘उनलाई अदालतले थुन्यो, सरकारले होइन। तर अहिले उनका समर्थकहरू मलाई नै गाली गर्छन्। उनलाई मैले नै राजनीतिमा ल्याएर गृहमन्त्री र उपप्रधानमन्त्रीसमेत बनाएको थिएँ ।’
अदालतको आदेशविरुद्ध चलाइएको हस्ताक्षर अभियानप्रति उनले रोष प्रकट गरेका छन् । ‘तीन करोडभन्दा माथि हस्ताक्षर पुग्यो भने अनौठो होला’, उनले भने, ‘त्यहाँभन्दा माथि चाहिँ नपुगोस् है ।’ उनले यो सरकार आगामी निर्वाचनसम्म कायम रहने स्पष्ट संकेत गरेका छन् ।
