राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानेन्द्र शाही ‘ग्लोबल हिरो’ अवार्डबाट सम्मानित भएका छन् ।
ग्लोबल नेपालीद्वारा संयुक्त राज्य अमेरिकाको न्युयोर्क शहरमा आयोजित भव्य समारोहमा शाहीलाई उक्त अवार्ड प्रदान गरिएको हो ।
राष्ट्र निर्माण र जनसेवामा पुर्याएको योगदानको कदरस्वरूप यो अवार्ड र सम्मान प्रदान गरिएको आयोजकले जनाएको छ ।
सम्मान ग्रहणपछि शाहीले कर्णाली र जुम्ली जनताका साथै देश विदेशमा रहेका सम्पूर्ण नेपालीहरूको विश्वासप्रति आभार व्यक्त गरे । उनले अवार्डको श्रेय उनीहरूप्रति समर्पित गरेका छन् ।
उनले भने, ‘ग्लोबल हिरो’ अवार्ड कर्णाली र जुम्ली जनताको भरोसाका साथै सम्पूर्ण देश विदेशमा रहेका नेपालीहरूको विश्वासको श्रेष्ठता हो । यो अवार्डको श्रेय उनीहरूप्रति समर्पित गर्दछु।’
उनले यो अवार्डले निःसन्देह समाजमा राम्रो काम गर्ने प्रेरणा दिने र एकताको भावनालाई बलियो बनाउने विश्वास व्यक्त गरे ।
शाहीले कार्यक्रमलाई सफल बनाउनका लागि आयोजकले गरेको अथक प्रयास, लगनशीलता र समर्पण साँच्चै प्रशंसनीय रहेको उल्लेख गरे ।
अवार्ड समारोहले नेपाली समुदायमा सकारात्मक सन्देश प्रवाह गरेको र सामाजिक कार्यमा लाग्न थप प्रोत्साहन मिलेको आयोजकले जनाएको छ ।
