झापा । मुख्यमन्त्री कप राष्ट्रिय महिला भलिबल प्रतियोगिता फागुन ११ गतेदेखि सुरु हुने भएको छ । नेपाल खेलकुद महासंघ कोशी प्रदेश कमिटीको आयोजनामा हुने प्रतियोगिता फागुन ११ देखि १६ गतेसम्म दमकमा हुने छ ।
बुधबार दमकमा पत्रकार सम्मेलन गर्दै आयोजकले यसबारे जानकारी दिएको हो । महासंघको आयोजना तथा कोशी प्रदेश खेलकुद विकास बोर्डको संयोजनमा उक्त प्रतियोगिता हुने जनाइएको छ ।
पत्रकार सम्मेलनमा बोल्दै कोशी प्रदेश खेलकुद विकास बोर्डका सदस्य सचिव तथा नेपाल खेलकुद महासंघका केन्द्रीय अध्यक्ष कृष्ण बस्नेत (पर्शुराम) ले प्रतियोगिताले खेलाडीहरूलाई आफ्नो क्षमता र प्रतिभा देखाउने अवसर प्रदान गर्ने बताए ।
बोर्डले हरेक वर्ष विभिन्न खेलको प्रतियोगिता आयोजना गर्दै आएको बताउँदै बस्नेतले खेल प्रतियोगिताको निरन्तर आयोजनाले खेलाडीको प्रतिभामा निखार आउने धारणा व्यक्त गरेका थिए ।
त्यस्तै, महासंघ कोशी प्रदेशका अध्यक्ष राजकुमार थापाले महिला भलिबल खेलले राष्ट्रिय तथा अन्तर्राष्ट्रियस्तरमा प्रगति गर्दै गएकोले स्थानीयस्तरमा समेत खेलाडीहरूलाई अवसर उपलब्ध गराउने किसिमले प्रतियोगिताको आयोजना गर्ने तयारी गरिरहेको बताए ।
थापाले महासंघ कोशी प्रदेशले गत वर्ष ‘केपी ओली रोड रेस’ प्रतियोगिता आयोजना गरेको बताउँदै कमिटीले महासंघको ‘एक कमिटी, एक खेल गतिविधि’ अनुरूप प्रतियोगिता आयोजना गर्ने तयारी गरेको जानकारी दिए ।
प्रतियोगितामा सातवटा प्रदेश र तीन विभागीय आर्मी, पुलिस र सशस्त्रको टोली गरी १० वटा टिमको सहभागिता रहने छ । प्रतियोगितामा प्रथम, दोस्रो, तेस्रो टोलीले क्रमश: पाँच लाख, तीन लाख र एक लाख ५० हजार नगद, ट्रफी र प्रमाणपत्र प्राप्त गर्ने छन् ।
