विराटनगर । मोरङको ग्रामथान गाउँपालिकामा सम्पन्न पालिकास्तरीय १६औं राष्ट्रपति रनिङ शिल्डमा जनक मेमोरियल प्रथम बनेको छ ।
ग्रामथान–३ सिद्राहास्थित वाणी माध्यमिक विद्यालयमा भएको रनिङ शिल्डमा जनक मेमोरियलले १० स्वर्ण, सात रजत र दुई कास्य गरी १९ पदक जित्यो ।
ग्रामथान गाउँपालिकाको शिक्षा तथा खेलकुद शाखाले आयोजना गरेको रनिङ शिल्ड बिहीबारदेखि सुरु भएको थियो ।
फाइनल खेल र पुरस्कार वितरण कार्यक्रम भने आइतबार गरिएको थियो, जसका विभिन्न विधामा जनक ग्रामथानभित्र १३ वटा संस्थागत र सामुदायिक विद्यालयलाई उछिन्दै प्रथम बनेको हो ।
जनकले छात्रा ३००० र १५०० मिटर दौडमा गोल्ड मेडल जितेको थियो, जनककी इशिका चौधरीले दौडतर्फ दुई स्वर्ण दिलाइन् ।
इस्तै, छात्रतर्फ १०० मिटरमा दौडमा पुकार चौधरी र ४०० मिटर दौडमा प्रभुनारायण माझीले स्वर्ण दिलाए ।
सर्ट पुट गर्ल्सतर्फ सन्ध्या चौधरीले गोल्ड जित्दा छात्रातर्फको लङ जम्पमा बसुन्धरा चौधरीले स्वर्ण जितिन् ।
उनले
छात्रातर्फको हाई जम्पमा पनि गोल्ड मेडल जितिन् ।
यसैगरी, छात्रातर्फको भलिबलमा जनकले स्वर्ण पदक जित्दा छात्रतर्फ ट्रिपल लङ जम्पमा ड्रोबिन चौधरीले गोल्ड मेडल हात पारे ।
छात्रतर्फ सय मिटरको रिले दौडमा पनि जनक प्रथम स्थान हासिल गर्यो ।
यस्तै, प्रभास चौधरीले जनकलाई दुई रजत पदक दिलाउँदा प्रभुनारायण माझी, मिलिन चौधरी, सन्ध्या खाँले एक–एक सिल्भर मेडल दिलाए ।
छात्रतर्फको कबड्डीमा र छात्रतर्फकै ४०० मिटरको रिले दौडमा जनकले रजत पदक जितेको थियो ।
यसैगरी, जनकका हिमेश माझीले २०० मिटरको दौडमा तेस्रो स्थान हासिल गर्दा छात्रतर्फ सय मिटरको रिले दौडमा कास्य पदक जित्यो ।
उनीहरूलाई प्रमुख अतिथिसमेत रहेका कोशी प्रदेशसभा सदस्य जयप्रकाश चौधरी, गाउँपालिका उपाध्यक्ष गुणावतीदेवी थारू, प्रमुख प्रशासकीय अधिकृत हरिप्रसाद भट्टराईलगायतले पुरस्कृत गरे ।
यससँगै ग्रामथान गाउँपालिका–२ झोराहाटस्थित जनक मेमोरियलले पठनपाठनका अलाबा अतिरिक्त क्रियाकलापमा पनि आफू उत्कृष्ट रहेको साबित गरेको छ ।
प्रतियोगिता तथा पुरस्कार वितरण कार्यक्रममा खेलाडीलाई हौसला प्रदान गर्न जनकका प्रिन्सिपल सुनील भगत, लेखा अधिकृत आलोक अधिकारी, खेल प्रशिक्षक करणकुमार माझी तथा शिक्षक-शिक्षिकाको उपस्थिति रहेको थियो ।
