ब्वाइज युनियन, सरस्वती र श्री भगवती क्लबले आ–आफ्नो खेलमा जित दर्ता गर्दै आजबाट सुरु भएको ‘बी’ डिभिजन लिगमा सुखद सुरुआत गरेका छन् ।
आजबाट सुरु भएको ‘बी’ डिभिजन लिगमा तीन खेल भएका थिए ।
आज सम्पन्न पहिलो खेलमा श्री भगवती क्लब र झम्सीखेल युथ क्लब आमनेसामने भएका थिए ।
ललितपुरस्थित अखिल नेपाल फुटबल सङ्घ (एन्फा)को मैदानमा भएको खेलमा भगवतीले झम्सीखेललाई ३–१ गोलान्तरले पराजित गर्यो ।
भगवतीलाई जिताउन अनिल गुरुङ, रमेश राई र मिलन खड्काले समान एक–एक गोल गरे ।
पहिलो हाफमा मन कुमार राईले गोल गर्दै झम्सिखेललाई एक–एकको गोलको बराबरीमा ल्याए पनि दोस्रो हाफमा कुनै गोल गर्न नसकेपनि झम्सिखेललले पहिलो खेलमा नै अङ्क गुमाएको हो ।
आजै सम्पन्न दोस्रो खेलमा बाँसबारी क्लबको सुरुवाती अग्रता उल्ट्याउँदै सरस्वती युथ क्लबले खेलमा बाजी मारेको छ ।
खेलको छैटौं मिनेटमा नै बिक्की राईले गोल गर्दै बाँसबारीलाई सुरुवातीलाई अग्रता दिलाए पनि खेललाई नियन्त्रणमा लिन सफल सरस्वती स्पष्ट तीन अङ्क जोड्न सफल भयो ।
सरस्वतीका लागि २१औं मिनेटमा विक्रम बिसुङ्खे, ८७औं मिनेटमा सृजल लामा र अतिरिक्त समयमा भुपेन्द्र शाहीले गोल गर्दै बाँसबारीलाई पाखा लगाए ।
‘बी’ डिभिजन अन्तर्गत आजै भएको अन्तिम खेलमा ब्वाइज युनियनले विरगञ्ज युनाइटेडलाई १–० ले स्तब्ध बनायो ।
दुवै टोलीले पहिलो हाफमा गोलरहित बराबरी खेले पनि दोस्रो हाफको ६४औं मिनेटमा ब्वाइजका लागि मिलन लिम्बू गोल गर्न सफल भए ।
लिम्बूको एकमात्र गोल नै खेलको निर्णायक गोल बन्यो ।
प्रतिस्पर्धात्मक बनेको खेलमा जित निकाल्दै ब्वाइजले स्पष्ट तीन अङ्क हात पार्दा विरगञ्जले भने हारबाट लिग प्रारम्भ गरेको छ ।
‘बी’ डिभिजन लिगमा भोलि ‘बिहीबार’ पनि तीन खेल हुँदैछन् ।
पहिलो खेलमा चर्च ब्वाइजले टुसाल युथ क्लबको सामना गर्दा दोस्रो खेलमा श्री कुमारी र नयाँबस्ती आमनेसामने हुँदैछन् ।
भोलि नै हुने तेस्रो खेलमा भने रानीपोखरी कर्नर टीम (एनआरटी) र खुमलटार युथ क्लब भिड्दैछन् ।
१४ क्लब सहभागी लिगका शीर्ष दुई टोली ‘ए’ डिभिजनमा बढुवा हुनेछन् भने अङ्कतालिकाको पुछारका दुई टोली रेलिगेसनमा पर्ने छन् ।
‘बी’ डिभिजन लिगका सबै खेल सिङ्गल राउन्ड रोबिन लिगको आधारमा हुनेछन् ।
