महाकाली नदीमा गाडी गुड्न सक्ने पक्की पुल निर्माण गर्न भारत र नेपालबीच सम्झौता भएको छ ।
नेपालस्थित भारतीय दूतावासले सार्वजनिक गरेको प्रेस विज्ञप्तिमा दुई राष्ट्रबीच पुल निर्माणका लागि सम्झौता पत्रमा हस्ताक्षर गरिएको बताइएको छ ।
सुदूरपश्चिम प्रदेशको दार्चुला र भारतको धार्चुला क्षेत्रमा रहेको महाकाली नदीमा पुल निर्माण गर्न गरिएको सम्झौतामा नेपालका लागि भारतीय राजदूत विनय मोहन क्वात्रा र भौतिक पूर्वाधार तथा यातायात मन्त्रालयका सचिव रविन्द्रनाथ श्रेष्ठले हस्ताक्षर गरेका छन् ।
भौतिक पूर्वाधार मन्त्री रेणु कुमारी यादवको उपस्थितीमा भएको सम्झौता अनुसार निर्माण हुने भनिएको पुलले दुई देशबीचको यातायात र त्यस क्षेत्रको विकासमा योगदान दिने विश्वास गरिएको छ ।
दुई राष्ट्रबीचको परम्परा र संस्कृति र भारतको उत्तराखण्ड राज्य र नेपालको सुदूरपश्चिम प्रदेशबीचको जनताको जीवनयापन उकास्न पुलले मद्दत गर्ने बताइएको छ ।
हाल त्यस क्षेत्रमा पक्की पुल छैन र दुई राष्ट्रका नागरिकले यात्रा गर्नु परे झोलुङ्गे र पूराना–परम्परागत पुलको प्रयोग गर्दै आइरहेका छन् ।
उत्तराखण्ड राज्य सरकारले निर्माण गरिदिने पुलको शिलान्यास र निर्माण कार्य चाँडै सुरू गरिने दुतावासले जारी गरेको प्रेस विज्ञप्तिमा बताइएको छ ।
हेर्नुहाेस् प्रेस विज्ञप्ति
