रियल मड्रिडको दोस्रो पटकको अग्रता आन्सु फाटीले गोल गर्दै बराबरी गरेपछि एलक्लासिको अतिरिक्त समयमा धकेलिएको छ ।
स्पेनिस सुपर कपको सेमिफाइनलको पहिलो हाफ १–१ गोलको बराबरी खेलेका दुवै टोलीले निर्धारित दोस्रो हाफमा पनि एक–एक गोल गरेपछि खेलमा ३० मिनेट समय थप गरिएको हो ।
दोस्रो हाफको ७३औं मिनेटमा करिम बेन्जेमाले गोल गर्दै रियललाई खेलमा दोस्रो पटक अग्रता दिलाएपनि ८४औं मिनेटमा हेडमार्फत गोल गर्दै फाटीले बार्सिलोनालाई खेलमा फर्काएका थिए ।
खेलमा पहिलो गोल गर्दै रियलले सुरुवाती अग्रता बनाएको थियो । भिनिसियस जुनियरले खेलको २५औं मिनेटमा गोल गर्दै रियललाई सुरुवाती अग्रता दिलाएका थिए । तर ४१औं मिनेटमा लुक डि योङले गोल गरेपछि पहिलो हाफमा दुवै टोलीले एक–एक गोलको बराबरी खेलेका थिए ।
आजको खेलको विजेताले उपाधिका लागि एट्लेटिको मड्रिड र एथ्लेटिक क्लबबीचको खेलको विजेतासँग प्रतिष्पर्धा गर्नुपर्नेछ ।
