काठमाडाैँमा जारी प्रधानमन्त्री (पिएम) कप टी–ट्वान्टी क्रिकेट प्रतियोगितामा विभागीय टोली एपिएफ क्लबले लगातार दोस्रो जित दर्ता गरेको छ । मङ्गलबार भएको खेलमा एपिएफले वाग्मती प्रदेशलाई ७ विकेटले हराउँदै दोस्रो जित निकालेको हो ।
समूह ‘बी’ को वाग्मतीले पहिलो खेलमा लुम्बिनी प्रदेशलाई ४९ रनले हराएको थियो । कीर्तिपुरस्थित त्रिभुवन विश्वविद्यालयको क्रिकेट मैदानमा वाग्मतीले दिएको एक सय २६ रनको विजयी लक्ष्य पछ्याएको एपिएफले १८ दशमलव चार ओभरमा तीन विकेटको क्षतिमा लक्ष्य पूरा गरेको थियो ।
एपिएफका लागि लोकेश बमले ५० रनको अर्धसतकिय इनिङ्स खेले भने प्रदीप ऐरीले अविजित ३६ रन बनाए । वाग्मतीका प्रतिस जिसी, रामनरेश गिरी र रिजन ढकालले एक-एक विकेट लिए ।
त्यसअघि पहिले ब्याटिङ गरेको वाग्मतीले निर्धारित २० ओभरमा आठ विकेटको क्षतिमा एक सय २५ रन बनाएको थियो । वाग्मतीका लागि इशान पाण्डेले सर्वाधिक २९ रन बनाए भने नन्दन यादवले २४, सुवास खकुरेलले २१ र आदिल खानले १९ रन बनाए ।
एपिएफका अविनास बोहराले चार विकेट लिए भने कमल ऐरीले दुई तथा शरद भेषावकर र किशोर महतोले एक एक विकेट लिए ।
जितसँगै चार अङ्क बनाएको छ । एपिएफ समूहको शीर्ष स्थानमा छ । पहिलो हार खेपेको वाग्मतीसँग दुई अङ्क छ ।
