शिक्षा, विज्ञान तथा प्रविधि मन्त्रालयले पुस २७ गतेदेखि माघ १५ गतेसम्म विद्यालयहरू बन्द गर्ने निर्णय गरेको छ ।
नेपालमा ओमिक्रोनका संक्रमित फेला पर्न थालेकाले विद्यार्थीको स्वास्थ्य, सुरक्षा तथा बचावटको विषयलाई विशेष ध्यान दिँदै विद्यालय बन्द गर्ने निर्णय मन्त्रालयले गरेको हो ।
मन्त्रालयका प्रवक्ता दीपक शर्माद्वारा जारी विज्ञप्तिमा वार्षिक बिदामा मिलान हुने गरी भोलिबाट नै देशभरका आधारभूत तथा माध्यमिक विद्यालयहरूमा बिदा दिने निर्णय गरिएको उल्लेख छ ।
बिदाको समयमा विद्यार्थीको सिकाइमा आवश्यक सहजीकरणको प्रबन्ध मिलाउन सम्बन्धीत विद्यालयलाई आग्रह गरिएकोे छ । साथै, विद्यालय बिदा हुँदाको अवधिमा १२ वर्षदेखि १७ वर्ष उमेर समूहका विद्यार्थीलाई सबै स्थानीय तहमा रहेका स्वास्थ्य चौकीमा कोभिडविरुद्धको खोप दिइने भएकाले अभिभावकलाई त्यसतर्फ ध्यान दिन समेत मन्त्रालयले आग्रह गरेको छ ।
विज्ञप्तिका अनुसार विश्वविद्यालय र शैक्षिक प्रतिष्ठानका पूर्व निर्धारित सेमेष्टर र वार्षिक परीक्षाका कार्यक्रम भने स्थगित गरिएको छैन । जनस्वास्थ्य र सुरक्षाका मापदण्ड पालना गरी जेड आकारमा विद्यार्थीको बसाइको व्यवस्थापन गरी परीक्षा लिन मन्त्रालयले आग्रह गरेको छ ।
