स्मार्ट लकडाउनबारे छलफल गर्न भोलि काठमाडौँ उपत्यकाका तीन प्रमुख जिल्ला अधिकारीहरूबीच छलफल हुने भएकाे छ ।
कोभिड-१९ सङ्कट व्यवस्थापन समन्वय केन्द्र (सीसीएमसीसी)ले स्मार्ट लकडाउनलाई कार्यान्वयनमा लैजान गृह मन्त्रालयमा सिफारिस गरेपछि कुन–कुन क्षेत्रलाई व्यवस्थित वा बन्द गर्ने भन्नेबारे तीन प्रमुख जिल्ला अधिकारी (सीडीओ)हरू भोलि बैठक बस्ने भएका हुन् ।
काठमाडौँ उपत्यकाका तीनै सीडीओले जोखिम पहिचान गर्दै आवश्यक पर्ने क्षेत्रहरू बन्द गर्ने निर्णय गर्ने तयारी गरेका छन् । भोलि बस्ने तीनै सीडीओको संयुक्त बैठकले स्मार्ट लकडाउनबारे निर्णय गर्ने भक्तपुरकी प्रम्ख जिल्ला अधिकारी रुद्रादेवी शर्माले जानकारी दिएकी छिन् । कतिपय निर्णय सीधै सीसीएमसीसीले गरेको र जोखिम पहिचानको आधारमा गर्नुपर्ने निर्णय भोली गरिने उनले बताइन् ।
बैठकले स्मार्ट लकडाउनबारे थप निर्णयहरू गर्ने काठमाडौँका सीडीओ गोविन्दप्रसाद रिजालले बताए । त्यस्तै, उपत्यकाका तीनै डीसीसीएमसीसीगृको आजको बैठकले भीडभाड हुने क्षेत्र बन्द गर्ने, परीक्षणको दायरा बढाउने, खोपलाई तीव्रता दिने र अस्पतालमा स्वास्थ्य पूर्वाधारको व्यवस्थापन गर्ने निर्णय गरेकाे छ ।
