नेपाली राष्ट्रिय फुटबल टोलीका मुख्य प्रशिक्षक अब्दुल्लाह अलमुताइरीले अफ्रिकी राष्ट्र मोरिससविरुद्ध मैत्रीपूर्ण खेल खेल्ने टिममा हेरफेर गरेका छन् ।
उनले आइतबार जगजित श्रेष्ठ र आशिष राईलाई टोलीमा बोलाउँदै सन्तोष तामाङलाई ‘आउट’ गरेको अखिल नेपाल फुटबल सङ्घ (एन्फा) ले जनाएको छ ।
यसअघि अल्मुताइरीले बन्द प्रशिक्षणमा बोलाएका ३४ खेलाडीमा जगजित र आशिष परेका थिएनन् । जगजितले विभागीय टिम त्रिभुवन आर्मी क्लबबाट र आशिषले च्यासल युथ क्लबबाट ‘ए’ डिभिजन लिग खेलिरहेका छन् ।
यस्तै, अल्मुताइरीले त्रिभुवन आर्मी क्लबका सन्तोष तामाङलाई टोलीबाहिर राखेका छन् । ‘ए’ डिभिजन लिग खेल्ने क्रममा घाइते भएपछि तामाङ टोलीबाट आउट भएको एन्फाले जनाएको छ । यससँगै अब नेपाली टोली ३५ सदस्यीय भएको छ ।
नेपालले जनवरी २९ र फेब्रुअरी १ मा मोरिसससँग दुई मैत्रीपूर्ण खेल खेल्दै छ । दुवै खेल त्रिपुरेश्वरस्थित दशरथ रङ्गशालामा हुने एन्फाले जनाएको छ । मोरिसस फिफा वरीयतामा नेपालभन्दा तीन स्थान तल छ । नेपाल एक सय ६९औँ स्थानमा रहँदा मोरिसस एक सय ७२औँ स्थानमा छ ।
नेपाली खेलाडीहरू
विशाल श्रेष्ठ, दीप कार्की, किरणकुमार लिम्बू, शत्रुघन चौधरी, टिकेन्द्र थापा, आशिष लामा, आयुश घलान, आकाश बुढामगर, अनन्त तामाङ, अन्जन विष्ट, एरिक विष्ट, विमल घर्तीमगर, विशाल राई, दर्शन गुरुङ, देवेन्द्र तामाङ, दिनेश हेमजन, दिनेश राजवंशी, गौतम श्रेष्ठ, कमल थापा, क्षितिज रन्त चुन्जु, अनिश डाँगी, नवीन गुरुङ, नीतिश थापा, पुजन उपरकोटी, सुवास गुरुङ, सुदीप गुरुङ, सुजल श्रेष्ठ, सुमन अर्याल, सुमन लामा, सुनिल बल, सुरजज्यू ठकुरी, सुशील राई र तेज तामाङ
