अस्ट्रेलियामा जारी बिग बास लिगको २०२१ संस्करण कोरोनाका कारण समस्यामा देखिएको छ ।
सहभागी क्लबका खेलाडीमा कोभिड सङ्क्र्मण देखिन थालेपछि आयोजक क्रिकेट अष्ट्रेलिया (अस्ट्रेलिया क्रिकेट सङ्घ) सुरक्षित तरिकाले बाँकी सिजन कसरी गराउनेतर्फ लागि परेको छ ।
मेलबर्न स्टार्सका १२ खेलाडीमा कोरोना सङ्क्रमण भएपछि क्लबले भिक्टोरियन क्लबका खेलाडीलाई प्रशिक्षणमा सहयोगका लागि बोलाएको थियो ।
त्यस्तै, ब्रिसबेन हिटका खेलाडीमा सङ्क्रमण भएको पाइएपछि आज अन्तिम समयमा खेल तालिका परिवर्तन गरी खेल खेलाइएको छ ।
खेलाडीमा सङ्क्रमण देखिएसँगै अन्य खेलाडी र क्लबका स्टाफलाई स्वस्थ राखी सिजन अन्त्य गर्नेतर्फ बिबिएलले ध्यान केन्द्रित गरेको छ ।
यसका लागि बाँकी सबै खेललाई मेलबर्नमात्रै सीमित गर्नेतर्फ आयोजकले तयारी गरिरहेको इएसपिएनले जनाएको छ ।
सम्भवतः आज (मङ्गलबार) बाँकी खेलका लागि बिबिएलले औपचारिक रूपमा स्थान तोक्न सक्नेछ ।
समूह चरणका ५६ मध्ये ३७ खेल सम्पन्न भइसकेको बिबिएलमा अझै समूह चरणका मात्रै १९ खेल र त्यसपछिका पाँच खेल हुन बाँकी नै छ ।
