स्पेनिस क्लब बार्सिलोनाले आफ्ना फ्रान्सेली फरवार्ड ओसमान डेम्बेलेलाई आफ्नो भविष्यबारे आफैं निर्णय गर्न अल्टिमेटम दिएको छ ।
२०२२ जुन अन्तिममा डेम्बेलेको बार्सिलोनासँगको सम्झौता सकिँदैछ । चोटका कारण आफूलाई बार्सिलोनामा खासै साबित गर्न नसकेको डेम्बेलेको अबको भविष्य के हुन्छ ? यसको उत्तर डेम्बेले र उनका प्रतिनिधिलाई मात्रै थाहा छ ।
‘हामीले हाम्रो प्रस्ताव वहाँहरुलाई सुनाइसकेका छौँ र हामी निरन्तर सम्पर्कमा छौँ’ बार्सिलोनाका फुटबल निर्देशक माटेउ अलेमानी भन्छन्, ‘हाम्रो अवस्थाबारे वहाँहरुलाई थाहा छ । वहाँलाई क्लबमा राख्न हामीले सक्ने सबै गरेका छौँ, बाँकी डेम्बेलेका इच्छा !’
क्लब र डेम्बेलेको प्रतिनिधिबीच पटक–पटक छलफल भएपनि त्यसले निष्कर्ष निकाल्न सकिरहेको छैन ।
बार्सिलोनाले गरेको प्रस्तावमा डेम्बेले सन्तुष्ट हुन नसके क्लबले उसलाई तुरुन्त बिक्री गर्ने सम्भावना रहेको छ । सम्झौता सकिएर फ्रि ट्रान्सफरमा खेलाडी पठाउन भन्दा थोरै भएपनि रकम क्लबको खातामा भित्र्याउने दाउमा बार्सिलोना रहेको छ ।
डेम्बेलेलाई बेच्न सके भर्खरै मात्र क्लबमा भित्रिएका फेरान टोरेसलाई बार्सिलोनाका खेलाडीका रुपमा ला लिगामा दर्ता गर्न क्लबलाई सजिलो हुनेछ । त्यसैले पनि क्लबले डेम्बेलेलाई चाँडो निर्णय लिन दबाब दिइरहेको छ ।
