मछिन्द्र फुटबल क्लब नेपालको प्रतिनिधित्व गर्दै एफएफसी कप छनोटमा सहभागी हुने पक्का भएको छ ।
आज भएको सहिद स्मारक ‘ए’ डिभिजन लिगको एक मात्र खेलमा नेपाल पुलिस क्लबलाई पराजित गर्दै मछिन्द्र क्लब छनोटमा सहभागी भएको हो ।
मछिन्द्रको जितका लागि पहिलो हाफमा सुनिल बलको एक मात्र गोल निर्णायक बन्यो । बलले खेलको २१औं मिनेटमा हेडमार्फत गोल गर्दै मछिन्द्रलाई अग्रता दिलाएका थिए । विशाल राईको फ्रिकिकमा आएको बललाई उनले जाली चुमाएका थिए
छनोटको दौडमा मनाङ मस्र्याङ्दी क्लब र मछिन्द्र फुटबल क्लबबीच कडा टक्कर भएको थियो ।
एएफसी कप छनोट खेल्न पाउने एएफसी क्लब लाइसेन्सप्राप्त चार नेपाली क्लबमध्ये त्रिभुवन आर्मी फुटबल क्लब र एपिएफ फुटबल क्लब यसअघि नै छनोटको दौडबाट बाहिरिसकेका थिए भने मछिन्द्र र मनाङबीच कडा प्रतिष्पर्धा भएको थियो ।
दोस्रो स्थानमा रहेको मछिन्द्र मनाङलाई पराजित गर्दै छनोट प्रतियोगिताको दौडमा पुनः फर्किएको थियो ।
सात खेल खेलिसकेको मछिन्द्रको ६ खेलबाट १७ अङ्क भएको छ भने दोस्रो स्थानमा रहेको मनाङले समान खेलबाट १६ अङ्क बटुलेको छ ।
सातौं चरणको खेलको समाप्तिसँगै लिग तालिकाको शीर्ष स्थानमा रहँदै मछिन्द्रले नेपालको एफएफसी कप छनोट प्रतियोगितामा सहभागी जनाउनेछ ।
