इङ्ग्लिस प्रिमियर लिगमा टोटनहमले कठिन जित आत्मसात गरेको छ ।
शनिबार राति टोटनहमले वाटफर्डलाई उसकै मैदानमा १–० गोलले हराएको हो । टोटनहमको जितमा डेभिन्सन सान्चेज नायक बने ।
खेलको पहिलो हाफ गोलरहित बराबरीमा सकिएको थियो । यो क्रमले ९० मिनेटको निर्धारित समयसम्म निरन्तरता पायो ।
खेलको इन्ज्युरी समयमा सान्चेजले गोल गर्दै टोटनहमलाई महत्त्वपूर्ण तीन अङ्क दिलाए । यससँगै टोटनहमले प्रिमियर लिगको सर्वाधिक सफल क्लब म्यानचेस्टर युनाइटेडलाई उछिनेको छ ।
टोटनहम युनाइटेडलाई विस्थापित गर्दै छैटौँ स्थानमा उक्लिएको हो । उसले १८ खेलमा ३३ अङ्क जोडेको छ ।
युनाइटेड समान खेलमा ३१ अङ्कसहित सातौँ स्थानमा खस्किएको हो । पराजित वाटफर्ड भने १३ अङ्कका साथ १७औँ स्थानमा छ ।
